Die Departement van Binnelandse Sake het aangekondig dat meer as 2 000 studievergunnings wat deur bedrog en korrupsie bekom is, gekanselleer gaan word in wat beskryf word as een van die grootste skoonmaakaksies nóg binne Suid-Afrika se immigrasiestelsel.
Die stap volg op ’n omvangryke ondersoek deur die Spesiale Ondersoekeenheid (SOE), wat ’n netwerk van korrupte amptenare, immigrasietussengangers en vals opleidingsinstellings blootgelê het wat oor twee dekades studievergunnings teen omkoopgeld verkoop het.
Die minister van binnelandse sake, Leon Schreiber, het gesê die kansellasies vorm deel van ’n breër poging om integriteit in die land se immigrasiestelsel te herstel en korrupsie binne die departement uit te roei.
“Hierdie is slegs die begin. Ons gaan voort om elke geval van bedrog op te spoor en op te tree teen almal wat die stelsel misbruik het,” het Schreiber gesê.
Die SOE-ondersoek is in 2024 deur president Cyril Ramaphosa gemagtig en het korrupsie blootgelê wat tussen 2004 en 2024 plaasgevind het. Volgens die bevindings is duisende studievergunnings uitgereik op grond van vervalste dokumente, vals inskrywings by opleidingsinstellings en selfs kursusse wat nooit bestaan het nie.
Omkoopgeld van tussen R15 000 en R40 000 per permit sou glo betaal gewees het om die dokumente te bekom. In sommige gevalle is fiktiewe kolleges geskep, terwyl ander aansoekers vals registrasies by wettige instellings gebruik het om die vereiste dokumentasie te bekom.
Wat die ondersoek besonder opvallend maak, is die omvang daarvan. Die SOE het meer as ’n miljard datapunte ontleed, insluitend immigrasierekords, universiteitsdata, biometriese inligting en finansiële transaksies, om die omvang van die bedrog vas te stel.
Volgens die departement is die meer as 2 000 studievisums wat nou gekanselleer word, slegs die eerste groep gevalle wat geïdentifiseer is. Ander permitte wat deur dieselfde persone bekom is, word tans ondersoek en is reeds vir verdere ondersoek gemerk.
NEWS: The Minister of Home Affairs, Dr Leon Schreiber, says following the SIU investigation into corruption into the Department, they will soon be cancelling all visas that were issued fraudulently.
He said they will start by cancelling 2000 fraudulent study visas that were… pic.twitter.com/42PIzRKgmc— Sihle Mavuso (@ZANewsFlash) June 14, 2026
Persone wie se studievergunnings ongeldig verklaar word, kan deportasie in die gesig staar. Waar voldoende bewyse bestaan dat individue doelbewus by bedrog betrokke was, kan strafregtelike vervolging ook volg.
Die departement werk nóú saam met die Valke om kriminele sake verder te ondersoek.
Die ondersoek het ook ernstige wanpraktyke binne Binnelandse Sake self blootgelê. Sedert April verlede jaar is meer as 20 amptenare afgedank, terwyl meer as 75 dissiplinêre sake afgehandel is. Verskeie sake is vir moontlike strafregtelike vervolging na die Valke verwys.
Schreiber sê die departement fokus nie net op die uitwissing van bestaande bedrog nie, maar ook op die voorkoming van toekomstige misbruik. Nuwe digitale stelsels, waaronder ’n elektroniese reisgoedkeuringsproses met biometriese gesigsherkenning, word tans uitgerol.
WATCH | Minister of Home Affairs Dr Leon Schreiber says that they are moving to cancel thousands of visas in the country, including just over 2,000 study visas. pic.twitter.com/x6IrLtLPDA
— SABC News (@SABCNews) June 14, 2026
Volgens die Minister het dié tegnologie reeds gehelp om duisende verdagte toeriste- en visumaansoeke te identifiseer voordat permitte uitgereik kon word.
Die aankondiging het sterk reaksie op sosiale media ontlok. Baie Suid-Afrikaners verwelkom die optrede en beskou dit as ’n noodsaaklike stap om beheer oor die land se immigrasiestelsel te herwin.
Verskeie kommentators het egter aangevoer dat die 2 000 permitte waarskynlik net die oortjies van die seekoei verteenwoordig. Sommige meen die ondersoek behoort uitgebrei te word na werk-, sake- en verblyfpermitte wat moontlik op soortgelyke wyse bekom is.
Die kwessie raak ook aan die breër debat oor immigrasie in Suid-Afrika. Kritici voer aan dat swak administrasie en korrupsie oor jare bygedra het tot openbare wantroue in die immigrasiestelsel, terwyl migranteregtegroepe waarsku dat wettige buitelanders nie as gevolg van die bedrog gestigmatiseer moet word nie.
Vir die regering is die boodskap egter duidelik: Die era waarin korrupte amptenare en sindikate Suid-Afrika se immigrasiestelsel straffeloos kon manipuleer, moet tot ’n einde kom.
Met verdere ondersoeke wat reeds aan die gang is, lyk dit of die kansellasie van die eerste 2 000 bedrieglike studievergunnings bloot die openingshoofstuk van ’n veel groter immigrasieskoonmaakoperasie is.
-
Lokprent is geskep deur Jaydeep Joshi van Pixabay.
