Diegene wat verantwoordelik was vir gister (Woensdag) se bomdreigement teen ’n FlySafair-vlug kan ’n boete of tronkstraf van tot 30 jaar, of albei, opgelê word as hulle gevang en skuldig bevind word.
’n Anonieme bomdreigement teen ’n FlySafair-vlug by King Phalo Internasionale Lughawe in KuGompo-stad in die Oos-Kaap het Woensdagoggend tot ’n groot sekuriteitsoperasie gelei.
Volgens die Suid-Afrikaanse Burgerlugvaartwet (Wet 13 van 2009) is dit ’n baie ernstige oortreding om ’n bomdreigement te maak, selfs as dit as ’n grap bedoel is. Die wet behandel dit as ’n ernstige sekuriteitsmisdryf, omdat dit massiewe ontwrigting, koste en potensiële gevaar veroorsaak. Die Suid-Afrikaanse Polisiediens (SAPD) en aanklaers neem dit ernstig op, en die maksimum straf kan tot 30 jaar tronkstraf beloop.
Die polisiediens het aangedui dat alle leidrade nagevors word.
Al 182 passasiers is veilig ontruim en die vliegtuig is volgens standaardprotokolle onder bewaking geplaas.
Die voorval het begin toe die polisie ’n oproep ontvang het van ’n onbekende persoon wat ’n privaat nommer gebruik het. Die inbeller het beweer dat daar ’n bom aan boord is van FlySafair-vlug FA388, wat van Johannesburg na King Phalo gevlieg het. Die vliegtuig het omstreeks 08:49 veilig geland. Kort daarna is al die passasiers en bemanningslede ontruim.
Die SAPD en die lugdiens het intussen meer inligting bekend gemaak.
Brigadier Nobuntu Gantana, woordvoerder van die SAPD in die Oos-Kaap, het bevestig dat die polisie dadelik ’n multidissiplinêre span geaktiveer het. Die span bestaan uit die bomontploffingseenheid, K9-plofstofopsporingshonde, gyselaaronderhandelaars, rampbestuur, lughawesekuriteit en nood- mediese dienste.
Die vliegtuig is deursoek deur die bomeenheid en die hondespanne, terwyl die bagasie en omgewing ook ondersoek is.
Die vliegtuig is onder bewaking geplaas as deel van standaardsekuriteitsprotokolle, nadat al 184 passasiers aan boord veilig ontruim is.
Die ondersoek na die oorsprong van die dreigement is aan die gang, maar geen verdere inligting is op hierdie stadium beskikbaar nie. Die publiek is gevra om nie te spekuleer nie en sekuriteitsagentskappe toe te laat om hul werk sonder inmenging te doen.
Die SAPD het beklemtoon dat die voorval as ’n geïsoleerde insident hanteer word. Die lughawe self is nie gesluit nie. Ander vlugte het soos beplan normaalweg gearriveer en vertrek, alhoewel sekuriteitsmaatreëls rondom die betrokke vliegtuig verskerp is.
FlySafair het intussen sy eie amptelike standpunt in ’n verklaring bekendgemaak. Die lugdiens het bevestig dat hulle in kennis gestel is van ’n potensiële sekuriteitsdreigement rakende vlug FA388. “Die vliegtuig het sy reis voortgesit en omstreeks 08:49 veilig by King Phalo geland.”
FlySafair het die bemanning en grondpersoneel bedank vir die kalm en professionele hantering van die situasie volgens vasgestelde veiligheids- en sekuriteitsprosedures. Die lugdiens het ook bevestig dat daar geen kansellasies van ander vlugte was nie en dat alle ander operasies normaal verloop het. “Ons werk saam met die owerhede en King Phalo-lughawe om die situasie te bestuur,” het die maatskappy gesê.
Die ondersoek fokus tans op die oorsprong van die oproep. Die polisie het teen gistermiddag nog nie bevestig of enige ontplofbare toestel gevind is nie.
Volgens die polisie was daar geen onmiddellike gevaar vir die res van die lughawe of omliggende gemeenskap nie.
Die voorval dien as herinnering aan die streng sekuriteitsprotokolle by Suid-Afrikaanse lughawens en die vinnige reaksie van gespesialiseerde eenhede wanneer sulke dreigemente ontvang word. Beide die polisie en die lugdiens het beklemtoon dat veiligheid van passasiers en personeel die hoogste prioriteit bly.
- Lokprent deur Marie-Louise Janneman van Pixabay
