Chrisna Beuke-Muir is ’n senior lektor in Afrikaans en Nederlands aan die Universiteit van Namibië en stigter van die Windhoek Woordfees.

Hoewel sy hoofsaaklik ’n letterkundige is, lê haar liefde by die teater, en sedert 2002 het sy dramaproduksies saamgestel wat uit poësie, dialoog en songs bestaan. Van die gedigte in hierdie dramas het sy self geskryf.

Tydens Windhoek Woordfees 2018 het sy die Afrikaans-Vlaamse podiumproduksie Passiedigters saamgestel en op die planke gebring saam met die Ten Adem-podiumdigters van Gent.

Sy tree in verskeie podiumproduksies in Suider-Afrika, asook in België, Nederland en Duitsland op. “George Weideman as dramaturg” is die titel van haar PhD (2010) onder Hennie van Coller.