Die Departement van Binnelandse Sake het Woensdag ten sterkste ontken dat Amerikaanse personeel aangehou of Afrikaner-applikante geïntimideer is tydens ’n deursoeking by ’n Amerikaanse vlugtelingfasiliteit in Johannesburg.
Die ontkenning volg nadat AfriForum se uitvoerende hoof, Kallie Kriel, op X beweer het dat Suid-Afrikaanse owerhede Amerikaanse beamptes aangehou en Afrikaners geteister het tydens die operasie.
Volgens Binnelandse Sake was die optrede deel van ’n roetine-operasie teen oortredings van immigrasiewette. Sewe Keniaanse burgers is tydens die deursoeking in hegtenis geneem nadat hulle Suid-Afrika met toeristevisums binnegekom het, maar by die sentrum gewerk het. Hulle is gedeporteer en vir vyf jaar verbied om weer die land binne te kom.
An intelligence‑driven Home Affairs operation in Johannesburg has led to the arrest of seven Kenyan nationals who were allegedly working illegally in South Africa while holding tourist visas. #HomeAffairs #Johannesburg #ImmigrationEnforcement #immigrationact
Read on… pic.twitter.com/XEZyJgxy8V— IOL News (@IOL) December 17, 2025
In ’n verklaring sê die departement twee Amerikaanse beamptes is wel kortliks ondervra, maar nie formeel aangehou of gearresteer nie. Ná ’n kort gesprek is hulle vrygelaat, en geen Amerikaanse burgers is aangekla of gedeporteer nie.
Kriel het egter op X volgehou dat Amerikaanse personeel aangehou is en dat Afrikaner-applikante geïntimideer is. Hy het die insident verbind aan breër bewerings van menseregteskendings teen Afrikaners, asook die regering se weiering om die lied “Kill the Boer” te veroordeel.
I have just confirmed with U.S. officials that the South African authorities did indeed raid a U.S. refugee facility in Johannesburg yesterday, detaining U.S. staff who have been processing Afrikaner refugees. The applicants who were present on the premises were subjected to…
— Kallie Kriel (@kalliekriel) December 17, 2025
“Ek het so pas met Amerikaanse amptenare bevestig dat die Suid-Afrikaanse owerhede [Woensdag] ’n Amerikaanse vlugtelingfasiliteit in Johannesburg deursoek het en Amerikaanse personeel aangehou het wat Afrikanervlugtelinge se aansoeke verwerk het,” het Kriel geskryf. Volgens hom is aansoekers wat op die perseel teenwoordig was, aan teistering en intimidasie onderwerp, ondanks die feit dat hulle geen wet oortree het nie.
Hy het verder beweer dat die optrede dui op ’n minagting van die menseregte van die aansoekers. “Sulke gedrag is nie onverwags van ’n regering wat steeds weier om menseregteskendings te veroordeel deur diegene wat oproepe tot die dood van Afrikaners maak deur die lied ‘Kill the Boer’ te sing nie,” het hy bygevoeg.
Binnelandse Sake ontken hierdie bewerings in ’n verklaring en beklemtoon dat geen Afrikaner-applikante tydens die operasie geteister of geïntimideer is nie. Die departement sê verder die deursoeking het nie op diplomatieke grond plaasgevind nie en is “volgens die wet en sonder intimidasie” uitgevoer.
Home Affairs arrests seven Kenyan nationals illegally
working on “refugee” applications.@HomeAffairsSA pic.twitter.com/gpjweiUZnd— Yusuf Abramjee (@Abramjee) December 17, 2025
“Die operasie is uitgevoer volgens dieselfde prosedures wat Binnelandse Bake die afgelope 18 maande verskerp het om die langdurige misbruik van Suid-Afrika se immigrasie- en visumstelsel hok te slaan,” lui die verklaring. “Geen Amerikaanse beamptes is gearresteer nie, die operasie was nie op ’n diplomatieke terrein nie, en geen lede van die publiek of voornemende ‘vlugtelinge’ is geteister nie.”
Die Amerikaanse Departement van Buitelandse Sake het die deursoeking intussen as “onaanvaarbare inmenging” beskryf en verduideliking van Suid-Afrika geëis. Woordvoerder Tommy Pigott het gesê die Trump-administrasie sal altyd Amerikaanse belange en personeel beskerm.
Volgens Binnelandse Sake wek die teenwoordigheid van buitelandse beamptes wat klaarblyklik saamwerk met ongedokumenteerde werkers ernstige vrae oor diplomatieke protokol. Die Departement van Internasionale Betrekkinge en Samewerking het formele gesprekke met beide die VSA en Kenia begin om die saak uit te klaar.
“Die operasie bevestig Binnelandse Sake se verbintenis tot die handhawing van die regstaat sonder vrees of guns,” sê die departement. “Dit onderstreep ook Suid-Afrika se gedeelde verbintenis met die VSA om onwettige immigrasie en visummisbruik te bekamp.”
AfriForum se reaksie pas in ’n breër patroon waar die organisasie soortgelyke voorvalle gebruik om bewerings van diskriminasie teen Afrikaners te versterk. Terwyl plaasaanvalle ’n erkende misdaadprobleem bly, wys misdaadstatistiek en onafhanklike ontledings daarop dat geweld in Suid-Afrika hoofsaaklik arm en kwesbare gemeenskappe raak, ongeag ras. Tot dusver is daar geen bewys van georganiseerde, rasgedrewe aanvalle nie.
Diplomatieke gesprekke tussen Suid-Afrika en die VSA duur voort, met beide regerings wat daarop aandring dat bestaande kanale gebruik sal word om die aangeleentheid uit te klaar. Die voorval kom te midde van reeds gespanne betrekkinge ná die instelling van Amerikaanse tariewe, hulpbevriesing en diplomatieke teenmaatreëls vroeër vanjaar.
Ontleders waarsku dat die politisering van immigrasie- en vlugtelingkwessies die bilaterale verhouding verder kan vertroebel. Hulle beklemtoon dat feitelike inligting en institusionele prosesse noodsaaklik bly om misverstande te voorkom en onnodige polarisasie te beperk.
