Inwoners van Johannesburg gaan ’n donker, droë naweek tegemoet met beurtkrag en groot dele van die stad sonder water.

Asof beurtkrag nie genoeg van ’n uitdaging is nie, is dele van die stad al dae lank sonder water, met weinig vooruitsigte dat dit die naweek veel sal verbeter. Inwoners is Donderdag gewaarsku dat die damvlakke steeds krities laag is.

Johannesburg Water Alert: Stage 2 water restrictions #JoburgUpdate ^K pic.twitter.com/B3ufO162R2

— Johannesburg Water (@JHBWater) October 6, 2022

Rand Water het vandeesweek fase 2-waterbeperkings ingestel, terwyl Eskom steeds tussen die verskillende fases bokspring.

Johannesburg se nuwe burgemeester, Dada Morero, het homself Donderdag daartoe verbind om toe te sien dat die stad se probleme met watervoorsiening dringend aandag kry. Morero het Johannesburg Water se reservoirs in Brixton en Hursthill besoek. Hy was ook by die Helen Joseph-hospitaal wat sommige van sy dienste moes opskort weens wateronderbrekings.

Boonop sit die stad sonder behoorlike politieke leierskap nadat die koalisieregering wat die stad bestuur het, in duie gestort het weens binnegevegte wat die stad se bestuur op ’n skinkbord aan die ANC oorhandig het.

Die DA betwis tans die ANC-koalisie se oorname van die stad se bestuur in die hof.

Inwoners moes die afgelope week in ’n tou staan ​​om water uit ’n tenk by Crown Gardens Clinic te gaan haal. Johannesburg Water het Woensdag ’n verklaring uitgereik om te sê dat daar ’n tydelike alternatiewe watervoorsieningsbron by Crown Gardens sal wees.

Mense in Ormonde, Johannesburg het 5 liter-bottels gebruik en op watertenkwaens staatgemaak om water te kry.

Die DA in Johannesburg sê in ’n verklaring hulle het kennis geneem dat die stad se nuwe burgemeester toesighoudende inspeksies van verskeie waterreservoirs en torings regoor die stad sal doen. Dit geskied te midde van fase 2-beperkings wat huise, besighede, skole en selfs gesondheidsfasiliteite soos Rahima Moosa en Helen Joseph geraak het. Al hierdie plekke het gesukkel om te funksioneer as gevolg van die vraag na water wat die toevoer van hul onderskeie boorgate en noodtenkwaens oorskry het.

Die DA-leier in Johannesburg, Mpho Phalatse, sê in haar verklaring die huidige situasie is niks minder nie as ’n krisis wat saamval met die voortdurende verdonkering wat tussen fase 3 en 4 wissel.

Phalatse sê toe Morero bewus geword het van wateronderbrekings regoor Johannesburg, moes hy dadelik begin het om werk daarvan te maak en nie eers dae later toe water drupsgewys by sommige dele herstel is nie.

“Nadat vasgestel is dat die stad se waterinfrastruktuur besig is om in duie te stort, het Johannesburg se veelparty-koalisieregering byna R800 miljoen aan watervoorsieningsinfrastruktuur en R600 miljoen aan sanitasiefasiliteite bewillig vir die 2022/23-begroting wat op 1 Julie 2022 in werking getree het.”

Phalatse sê onstabiele dienslewering wat veroorsaak is deur die “onwettige verwydering” van die veelpartystadsbestuur begin reeds wys.

Volgens haar is daar min tot geen kommunikasie nie met die inwoners oor die voortslepende waterkrisis. “Ons het onlangs berigte ontvang dat daar ook geen vullisverwydering in dele van die stad is nie. Met geen einde in sig vir die kragonderbrekings nie, is dit onduidelik of die werk om onafhanklike kragprodusente (IPP's) te ontplooi, sal voortgaan,” het sy gesê.

Phalatse sê ter wille van Johannesburg se inwoners hoop sy dat Morero in staat is om antwoorde en ’n plan te verskaf vir die waterkrisis wat inwoners óf dae lank sonder water gelaat het, óf met slegs ’n periodieke toevoer. Sy inspeksie van waterinfrastruktuur sal volgens haar bloot ’n openbare-betrekkinge-foefie wees as ’n plan nie verwoord word nie.

“As dit ’n teken is van regering wat kom, sal Johannesburg agteruitgaan.” Sy sê dit is noodsaaklik dat die DA hom tot die hof wend om die onwettige optrede van verlede week om te keer en die koalisie te hergroepeer sodat die herstel en herbouing van Johannesburg kan voortgaan onder ’n leierskap wat omgee en in pas is met die behoeftes van die stad se  inwoners.