Frustrasie en verwarring oor die ramptoestand se steeds veranderende regulasies het Suid-Afrikaners die harnas in. Intussen maak die land hom gereed vir die ergste sedert die koronavirus dag na dag sy kloue al hoe dieper inslaan.

Dit was veral president Cyril Ramaphosa se onverwagse en skielike verbod op die verkoop van alkohol wat verbruikers sowel as die landboubedryf onverhoeds betrap het Sondagaand.

Verbruikers kon nie eers soos met die aanvang van die ramptoestand voortydig voorsiening maak vir ’n sopie om die koue wintersaande meer draaglik te maak nie. Enkele minute nadat Ramaphosa Sondagaand aangekondig het die verkoop van alkohol word weer met onmiddellike ingang verbied, het die Staatskoerant met die nuwe regulasies verskyn.

Selfs die landbousektor het dit nie sien kom nie. Agri Wes-Kaap sê daar was vermoedelik geen beraadslaging met die landboubedryf oor die herinstelling van die verbod op die verkoop van alkohol nie. Ramaphosa se aankondiging was vir die bedryf soos ’n hou in die maag.

Die bestuurshoof van Agri Wes-Kaap, Jannie Strydom, sê die uitwerking van die verbod hou nie by die plaashek of die handelaar op nie. Hy sê daar is ook praktiese implikasies, soos dat daar nie plek vir die 2021-oes is as die 2020-oes nog in die kelder is nie. Strydom sê die totale drankbedryf, waarvan die wortels in die landbou lê, word negatief geraak. Die wynbedryf het reeds ’n verlies van meer as R3 miljard gely toe die verkoop van alkohol onder vlakke 4 en 5 verbied is. Die staatskas verloor ook miljarde rand aan broodnodige aksynsbelasting.

Die amptelike opposisie het ook geen goeie woorde vir die President gehad nie. Die tussentydse leier van die DA, John Steenhuisen, het kort na Ramaphosa se toespraak ’n verklaring uitgereik waarin hy kaalvuis onder die regering inklim. Die DA sê die regering wil die virus met foefies en leuens bestry.

“Ons het vanaand ’n president gesien wat vasbeslote is om sy verantwoordelikheid te ontduik deur die landsburgers wat hy gefaal het om te beskerm te blameer. Die regering se verbod op alkohol en die herinstelling van die aanklokreël is slegs ’n weerligafleier van die ware probleem, naamlik die mislukking van regeringskant om die behandeling en toetskapasiteit vir die koronavirus reg te kry,” het die DA in hul verklaring gesê.

Volens die DA het die regering ’n Marshallplan nodig om die pandemie te hanteer en nie oneffektiewe foefies en blatante leuens nie.

Verskeie koerante het Maandag ook verwarring gesaai deur verkeerdelik te berig die regulasies wat Sondag laataand gepubliseer is, sluit in dat strande weer oopgestel is. Media24 het Sondagaand berig dit is die eerste keer dat strande mag oopmaak sedert die inperking. Daar was egter nie sprake daarvan in die regulasies nie en Maandag moes hulle die lesers in kennis stel strande bly gesluit.

Intussen sê die Toerisme-sakeraad  hy oorweeg regstappe teen die regering oor onsekerheid rakende reise tussen provinsies. Die kantoor van die presidensie het skynbaar teruggekrabbel na ’n inskrywing op Twitter verlede week oor die toelaatbaarheid van reise vir ontspanningsdoeleindes. Die bestuurshoof van die raad, Tshifhiwa Tshivhengwa, sê hulle win regsadvies in. Tshivhengwa sê die inskrywing het Vrydagaand verskyn en het teen Saterdag verdwyn. Hy sê hulle sal moontlik die howe nader omdat inperkingsregulasies ’n verwoestende effek op die toerismebedryf het.

Die regering staar ook ander hofsake in die gesig wat verband hou met die rampbestuursregulasies.  Die minister van samewerkende regering, Nkosazana Dlamini-Zuma, sê in haar aansoek om verlof om appèl teen die hooggeregshofuitspraak oor die ongeldigheid van vlak 3-regulasies die hof het fouteer in sy uitspraak en dat die algehele ongeldigheidsverklaring van die regulasies nie geregverdig is nie, aldus Netwerk24. Volgens Netwerk24 sê sy die hof se uitspraak het verwarring by die publiek geskep oor die geldigheid van die regulasies.