’n Voorstel vroeër vanjaar in die parlement om Suid-Afrika se naam te verander het baie Suid-Afrikaners opnuut aan die gons
Die African Transformation Movement (ATM), onder leiding van Vuyo Zungula, het met hernude pogings begin om die land se naam van die Republiek van Suid-Afrika na die Republiek van Azanië te verander.
Hierdie voorstel, wat op 20 Mei 2025 in die parlement voorgelê is, maak nou opslae op sosiale media. Dit maak deel uit van ’n breër pakket voorgestelde grondwetlike wysigings wat daarop gemik is om glo die land “se identiteit te dekolonialiseer en nasionale soewereiniteit te versterk”.
[ICYMI]
ATM President @ZungulaVuyo moves that @ParliamentofRSA debates the need to fully decolonize the countries name and identity.
"This country must be rename to Azania, The land of black people given by God"#ATMInParliament pic.twitter.com/NlI0zaXOD6
— African Transformation Movement (@ATMovement_SA) May 20, 2025
Die ATM beplan om die voorstel aan die parlement en die grondwetlike hersieningskomitee voor te lê vir verdere bespreking. Dit vorm deel van ’n reeks voorgestelde grondwetlike wysigings, insluitend die vervanging van die woord "almal" met "burgers" in dele van die Grondwet om regte vir Suid-Afrikaanse burgers te prioritiseer, die herstrukturering van die magsbalans tussen howe en die parlement, en grondhervorming om historiese ongeregtighede aan te spreek.
Zungula het ook aangedui dat die party wil verhoed dat buitelanders grond besit, aangesien dit glo plaaslike inwoners benadeel, en dat die land se mineralerykdom deur Suid-Afrikaners besit moet word.
Die voorstel het egter gemengde reaksies uitgelok, met sommige wat dit as ’n noodsaaklike stap na kulturele herwinning beskou, terwyl ander dit as onnodig en opportunisties bestempel.
Oh, just fuck off, already.https://t.co/7A4lUkI1RH pic.twitter.com/9fM0IxRXej
— Aaron (@LibertarianZA) July 2, 2025
Die voorstel is nog in ’n vroeë stadium en moet ’n lang pad loop voordat dit geïmplementeer kan word. Dit vereis goedkeuring van die grondwetlike hersieningskomitee, uitgebreide openbare verhore, en ’n tweederdemeerderheid in die parlement om die Grondwet te wysig, aangesien die land se naam in die Grondwet verankerd is.
Die kans dat dit sal slaag, is dus uiters gering.
Volgens Zungula is die naam “Suid-Afrika” ’n koloniale oorblyfsel wat in 1910 met die vorming van die Unie van Suid-Afrika deur Britse en Boeremagte afgedwing is. “Voor 1652 was ons nie Suid-Afrikaners nie. Die naam ‘Suid-Afrika’ simboliseer ’n stelsel wat ontwerp is om inheemse mense te onderdruk,” het hy gesê.
Zungula argumenteer dat die naam Azanië, wat histories deur anti-apartheidgroepe soos die Pan Africanist Congress (PAC) gebruik is, die land se kulturele en historiese identiteit beter weerspieël. “Hierdie land moet hernoem word na Azanië, die land van swart mense wat deur God gegee is,” het hy bygevoeg, met verwysing na die naam as ’n simbool van bevryding en nasionale trots.
Die ATM geniet glo steun van ander politieke partye en groepe wat soortgelyke dekolonialiseringsideologieë ondersteun, hoewel daar nog nie spesifieke bondgenote geïdentifiseer is nie.
A proposal has been put forward to rename South Africa 🇿🇦 to the Republic of Azania.
This suggestion, supported by the African Transformation Movement (ATM) and other political parties, aims to adopt a name they believe better reflects the country’s identity. pic.twitter.com/j7950RYGrx
— Africa First (@AfricaFirsts) July 3, 2025
Die voorstel het reeds skerp kritiek ontlok. Die politieke ontleder Kenneth Mokgatlhe het dit as “onnodig en irrelevant” bestempel, met die argument dat “Suid-Afrika” ’n neutrale geografiese beskrywing is, soortgelyk aan name soos Suid-Soedan, Noord-Masedonië en die Sentraal-Afrikaanse Republiek. Hy het aan Eyewtiness News gesê daar is geen verband tussen die naam Azanië en die inheemse bevolking van Suid-Afrika nie.
KENNETH MOKGATLHE | There's no link between the name ‘Azania’ and the indigenous people of South Africa. https://t.co/YCtA7uWNTB pic.twitter.com/dXsYejZ0nd
— Eyewitness News (@ewnupdates) July 1, 2025
Op X het talle gebruikers die voorstel as “belaglik” en “onnosel” gekritiseer, met die argument dat die naam Suid-Afrika geen koloniale betekenis dra nie. Die debat het ook verdeeldheid op ander sosiale media veroorsaak, met sommige wat die voorstel ondersteun as ’n stap na herwinning van erfenis, terwyl ander dit as simboliese politiek sonder praktiese waarde beskou.
Die gebrek aan breë openbare en politieke konsensus oor die naam Azanië is ’n verdere struikelblok vir diegene wat die land se naam wil verander. Terwyl dit resoneer met groepe wat anti-apartheid- en dekolonialiseringsideologieë ondersteun, is daar twyfel oor of dit die diverse Suid-Afrikaanse bevolking kan verenig. Die openbare konsultasieproses, wat verpligtend is vir grondwetlike wysigings, sal waarskynlik hewige debat ontlok, soos wat reeds oral op sosiale media gesien kan word.
Die waarskynlikheid dat die voorstel in die nabye toekoms sal slaag, bly dus skraal weens die komplekse wetgewende proses en die verdeelde openbare sentiment. Die nasionale gesprek oor identiteit, erfenis en soewereiniteit is egter ver van verby, en die voorstel sal beslis verdere debat aanwakker.
