Die Internasionale Geregshof het ingestem om volgende week ’n verhoor te hou om Suid-Afrika se versoek om ’n dringende uitspraak oor volksmoordaanklagte teen Israel vir sy militêre offensief op Gaza te bespreek.
Israel het Dinsdag aangekondig dat hy voor die hof in Den Haag sal verskyn om die aanklag van volksmoord te betwis.
Die verhoor is vir 11 en 12 Januarie 2024 geskeduleer.
Die Internasionale Geregshof word deur ’n statuut van die Verenigde Nasies bedryf. Dit word ook soms die Wêreldhof genoem.
The International Court of Justice has agreed to hold a hearing next week to discuss South Africa’s request for an urgent ruling on genocide charges against Israel for its military offensive on Gaza.
Israel announced on Tuesday that it will appear before the court in The Hague…
— ICJP (@ICJPalestine) January 3, 2024
Suid-Afrika het verlede week die eerste land geword wat ’n saak teen Israel by die Internasionale Geregshof aanhangig gemaak het. Die stap het die internasionale druk op Israel verhoog om die dodelike en meedoënlose bombardering van die Gaza-strook te stop ná Hamas se aanval op Israel.
Israel het oorlog teen Hamas verklaar nadat die groep ’n massiewe aanval op gemeenskappe binne Israel gelei het waarin sowat 1 200 mense gedood is, meestal burgerlikes, en sowat 240 ander as gyselaars na Gaza ontvoer is.
Suid-Afrika is ’n stoere ondersteuner van die Palestyne en het Israel herhaaldelik veroordeel sedert die begin van die oorlog op 7 Oktober verlede jaar.
In die klag van 84 bladsye wat Suid-Afrika op 29 Desember by die hof aanhangig gemaak het, word voorbeelde gegee van die brutaliteit wat na bewering in Gaza gepleeg word, en die hof word gevra om dringend te verklaar dat Israel verantwoordelik gehou moet word vir die slagting in Gaza.
COMMUNIQUÉ: L’#AfriqueduSud introduit une instance contre l’#Israël et prie la #CIJ d’indiquer des mesures conservatoires https://t.co/t50jVV0ntC pic.twitter.com/TFugFWwIRK
— CIJ_ICJ (@CIJ_ICJ) December 29, 2023
Die stap is die jongste in ’n lang lys aksies wat Suid-Afrika sedert die begin van die oorlog teen Gaza gedoen het, insluitend die onomwonde veroordeling van Israel se aanvalle op Gaza en die Wesoewer.
Die Suid-Afrikaanse ambassadeur is ook reeds uit Israel herroep en het gevra vir ’n buitengewone vergadering van die Brics-lande om oor die konflik te beraadslaag.
Suid-Afrika beskuldig Israel daarvan dat hy volksmoord in Gaza gepleeg het, in stryd met die Volksmoordkonvensie van 1948 wat volksmoord definieer as “dade wat gepleeg is met die doel om ’n nasionale, etniese, rasse- of godsdiensgroep geheel of gedeeltelik te vernietig”.
Israel het dit reeds duidelik gestel dat hy Suid-Afrika se bewering dat hy dade van “volksmoord” in Gaza pleeg, by die Internasionale Geregshof sal beveg.
Meer as 22 000 Palestyne – die meeste van hulle burgerlikes – is dood in Israeliese aanvalle sedert die oorlog begin het, volgens Gaza se ministerie van gesondheid wat deur die Islamitiese groep Hamas bestuur word.
Suid-Afrika se presidensie het ná sy aansoek by die Wêreldhof gesê die land is verplig “om te verhoed dat volksmoord plaasvind”.
Eylon Levy, woordvoerder van die Israeliese regering, het Dinsdag in ’n verklaring gesê die regering sal voor die Internasionale Geregshof verskyn “om Suid-Afrika se absurde bloedlaster te betwis”.
Suid-Afrika “gee politieke en wetlike dekking” aan die Gaza-gebaseerde Hamas- militante groep vir sy bloedbad op 7 Oktober op Israeli’s, het hy gesê.
Israel condemns South Africa’s decision to play advocate for the devil.
History will judge South Africa for its criminal complicity with the bloodiest massacre of Jews since the Holocaust, and it will judge it without mercy. pic.twitter.com/EzCc3ETT2L
— Eylon Levy (@EylonALevy) January 2, 2024
“Hoe tragies dat die reënboognasie wat trots is daarop om rassisme te beveg, pro bono vir anti-Joodse rassiste sal veg,” het Levy gesê. “Die geskiedenis sal Suid-Afrika oordeel omdat hy die moderne erfgename van die Nazi’s bygestaan het.”
Benewens volksmoord, beweer Suid-Afrika dat Israel ander oortredings van die internasionale reg in die Gaza-strook pleeg, insluitend die aanval op die Palestynse kultuur deur terreine van “godsdiens, onderwys, kuns, wetenskap, historiese monumente, hospitale en plekke waar die siekes en gewondes behandel word”, te vernietig.
Kragtens die Volksmoordkonvensie kan lidlande van die Wêreldhof aanklagte van volksmoord teen ander lande indien, ongeag of hulle direk by die konflik betrokke is of nie. In 2019 het Gambië namens die Organisasie vir Islamitiese Samewerking die hof genader teen Mianmar met ’n versoek dat Mianmar beweerde gruweldade teen die Rohingya-volk sal staak.
Israel en Suid-Afrika is albei lede van die Wêreldhof, wat beteken dat die hof se uitsprake bindend vir beide lande is. Hoewel die Wêreldhof se uitsprake meer gewig dra as die VN-Veiligheidsraad s’n, waar Israel streng deur die VSA beskerm word, het die hof nie afdwingingsmag nie. Die hof se bevele is al in sommige gevalle geïgnoreer met geen ernstige gevolge nie.
