Talle vrae hang oor die militêre opleiding wat aan 95 Libiërs gegee is in ’n private opleidingskamp by Witrivier in Mpumalanga, en veral oor die regering se klaarblyklike onkunde daaroor.
Dit volg nadat Suid-Afrikaanse polisie verlede week 95 Libiese burgers gearresteer en vir ondervraging aangehou het weens die vermoede dat hulle opleiding by ’n geheime militêre kamp ontvang het.
Die opleiding het glo onder die dekmantel van sekuriteitsopleiding geskied.
Die beweerde militêre kamp is op ’n plaas naby Witrivier in Mpumalanga geleë.
Dit kom boonop nadat die Internasionale Finansiële Aksietaakmag (FATF) Suid-Afrika verlede jaar op die gryslys geplaas het van lande wat nie sterk genoeg teen geldwassery en terrorisme optree nie.
Die leier van die VF Plus en minister van korrektiewe dienste, Pieter Groenewald, sê in ’n verklaring hy het in die onlangse verlede verskeie vrae in die parlement gevra oor die militêre opleiding wat buitelandse groepe in Suid-Afrika ontvang, veral in die Oos-Kaap.
Groenewald sê antwoorde hierop was telkens ontkennend.
“Die Witrivier-voorval bied nou onomstootlike bewyse dat dit wel die geval is en dat die regering straks iets het om weg te steek oor die aangeleentheid,” sê Groenewald.
Met die opstande in Julie 2021 in KwaZulu-Natal het die VF Plus ook gewaarsku dat die land se intelligensiedienste nie op standaard is nie en dat dit opgeknap moet word. Dit het klaarblyklik nog nie gebeur nie.
Groenewald sê om toe te laat dat buitelanders militêre opleiding in Suid-Afrika ontvang, en dat dit moontlik met terrorisme verbind kan word, tas die territoriale integriteit van die land ernstig aan.
Luidens ’n berig in die Daily Maverick van 28 Julie 2024 (“Libyans arrested at SA security training firm linked to group which once tried to topple UN-backed Tripoli government”) word die 95 persone verbind met ’n groep wat onstabiliteit in Afrika teweeg wil bring.
“Indien daar nie vinnig klarigheid oor hierdie aangeleentheid kom nie, sal die mense van Suid-Afrika kan eis dat koppe moet rol,” het Groenewald gesê.
Hy sê Suid-Afrika kan nie ontaard in ’n opleidingsbasis vir internasionale terreurgroepe wat die burgers van die land se veiligheid bedreig nie.
Die SAPD se nasionale woordvoerder, Athlenda Mathe, het op X gesê die Libiërs het gesê dat hulle die land met studievisums binnegekom het om as veiligheidswagte opgelei te word, maar polisieondersoeke dui daarop dat hulle militêre opleiding ontvang het.
Die 95 Libiërs is by ’n plaas in Witrivier gearresteer vir die oortreding van die immigrasiewet. Hulle het hulself na bewering wanvoorgestel op hulle visumaansoeke.
95 Libyans have been arrested at a farm in White River in MP for contravening the immigration act.They allegedly misrepresented themselves on visa application to SA claiming they were coming to train as security guards. MP police suspect they are receiving military training. pic.twitter.com/EIRqQzTg37
— Athlenda Mathe (@AthlendaM) July 26, 2024
Die minister van polisie, Senzo Mchunu, het ook Maandag die vermeende militêre opleidingsbasis in Masoyi besoek. Hy sê die kamp, wat aanvanklik as ’n veiligheidsopleidingskamp aangewys is, is na bewering in ’n militêre opleidingsbasis omskep. Kommissaris Fannie Masemola het sedertdien vir kalmte gevra.
Deelnemers aan die gesprek op X het gesê hulle vind dit vreemd dat soveel Libiërs dit kon regkry om Suid-Afrika oor soveel landsgrense binne te kom om as sekuriteitswagte opgelei te word. Dit terwyl Psira-wetgewing nie toelaat dat ’n buitelander as ’n veiligheidswag opgelei word nie, tensy daardie persoon ’n permanente burger van hierdie land is.
Verskeie mense was dit eens dat hulle in die land was om militêre opleiding te kry.
Van die vrae wat gevra word is: Wie het hulle visums goedgekeur? Was dit korrupte amptenare van Binnelandse Sake gewees? Indien wel, behoort diegene wat hul visums goedgekeur het, vir korrupsie aangekla te word.
Daar is algemene konsensus dat ’n Psira-geregistreerde instelling nie iemand sal oplei wat nie ’n permanente burger van hierdie land is nie.
