Aansienlike vordering is die afgelope tyd gemaak om die grootskaalse korrupsie in die land se konstruksiesektor hok te slaan.
Kaizer Kganyago, woordvoerder van die Spesiale Ondersoekeenheid (SOE), sê in ’n verklaring daar is reeds honderde arrestasies gemaak wat verband hou met onwettige praktyke in die konstruksiebedryf.
Die Infrastructure Built Anti-Corruption Forum (IBACF) het die vordering wat die Suid-Afrikaanse Polisiediens (SAPD) en ander wetstoepassingsagentskappe gemaak het met die onderdrukking van die konstruksiemafia verwelkom.
“Die SAPD het bevestig dat die 712 sake wat vir ondersoek verwys is, tot dusver tot 722 arrestasies en 52 skuldigbevindings gelei het,” het Kganyago gesê.
Volgens Kganyago het die nasionale prioriteitskomitee oor afpersing en geweld by ekonomiese terreine by ’n onlangse vergadering van die IBACF berig dat “die stryd teen bedrog, korrupsie en wanadministrasie in die konstruksiesektor besig is om aansienlike veld te wen”.
’n Opvallende onlangse arrestasie was dié van vermeende 28’s bendebaas Ralph Stanfield en sy vrou, Nicole Johnson. Verskeie Kaapstadse konstruksiekontrakteurs moes reeds regeringsbehuisingsbouterreine verlaat weens beweerde dade van intimidasie en geweld teen hulle. Daarna het die Wes-Kaapse regering se Departement Menslike Nedersettings die kontrakte vir die voltooiing van hierdie projekte aan Johnson se maatskappy, Glomix House Brokers, toegeken.
Die gemeenskap waar die huise gebou word, vrees verdere bende-intimidasie.
Die IBACF is in 2020 gestig en is daarop gemik om infrastruktuurprojekte te monitor en stelsels daar te stel om korrupsie op te spoor en te voorkom.
Die forum bestaan uit verteenwoordigers van die burgerlike samelewing, en verteenwoordigers van die bouomgewingsektor en verskeie takke van die regering, insluitend die SOE.
The IBACF wishes to congratulate the South African Police Services and law enforcement agencies on their progress in tackling the criminal elements involved in the extortion and threats to construction workers, construction projects and investment in infrastructure of the country pic.twitter.com/qcfrr6HolK
— Special Investigating Unit (SIU) (@RSASIU) December 18, 2023
“Daar is voortdurende ondersoeke in die sektor deur verskeie wetstoepassingsagentskappe wat gelei het tot optrede soos bateherwinning, dissiplinêre stappe en kriminele vervolging,” sê die SOE in hulle verklaring.
Kganyago sê die konstruksiemafia bestaan uit groepe afpersers wat probeer om deur geweld beskermingsgelde van plaaslike konstruksiemaatskappye en kontrakteurs te ontvang of ’n gedeelte van die koste van ’n infrastruktuurprojek af te pers. Dit sluit spesifieke individue in wat verbonde is aan die mafia en wat gewerf word om op die terrein te werk.
Die konstruksiesektor is een van die belangrikste werkskeppende sektore in die land
Beleggings in die sektor bevoordeel nie net die land deur verbeterde infrastruktuur nie, maar skep honderde duisende werksgeleenthede op konstruksieterreine en regdeur die konstruksiesektor se waardeketting.
Navorsingsdokumente wat gedurende die afgelope twee jaar gepubliseer is, het volgens die SOE die impak van konstruksiesektormafia op konstruksieprojekte en investering in die sektor onthul.
“In die tydperk tot 2022 is tot R63 miljard se projekte aangemeld, en vertraag of gekanselleer as gevolg van die afpersingstaktieke en ontwrigtings wat deur die konstruksiemafia gestel is,” het Kganyago gesê.
Die SOE het ’n beroep op gemeenskapslede gedoen om enige onwettigheid op konstruksieterreine aan te meld.
Die IBACF moedig alle Suid-Afrikaners wat bewus is van enige kriminele optrede soos dreigemente van geweld of afpersing wat tot die verlies van sulke projekte en werksgeleenthede kan lei, aan om hierdie misdade aan te meld.
Misdade van hierdie aard kan aangemeld word by:
– enige SAPD-stasie
– die tolvry Nasionale Anti-Korrupsie Blitslyn by 0800 701 701;
– die Presidensiële Blitslyn by 17737 of e-pos president@po.gov.za
– die SIU Blitslyn by 0800 037 774.
“Soos die SAPD terugrapporteer oor arrestasies en skuldigbevindings, waarsku ons die publiek dat daar gevolge is vir mense wat betrokke is by onwettige aktiwiteite binne die konstruksiesektor. Die IBACF bedank die fluitjieblasers en wetstoepassingsagentskappe vir hul dapperheid en geweldige pogings om hierdie kriminele sake aan te pak,” het Kganyago gesê.
