Johannesburg se voortslepende waterkrisis het ’n nuwe politieke wending geneem nadat Gauteng se premier, Panyaza Lesufi, om verskoning moes vra vir ’n omstrede opmerking dat hy soms by ’n hotel gaan stort het te midde van wydverspreide wateronderbrekings.
Terselfdertyd hou burgemeester Dada Morero vol dat die stad nie in ’n formele “Dag Zero”-toestand is nie, terwyl die DA aangekondig het dat hulle die stad, en Johannesburg Water, hof toe wil neem oor wat hulle beskryf as volgehoue bestuursmislukkings.
Die krisis, wat sedert laat Januarie vererger het, het talle woonbuurte, soos Melville, Emmarentia en Brixton, en dele van Soweto, Midrand en Johannesburg-Oos, vir tot 24 dae sonder water gelaat. Inwoners kla oor droë krane, ongereelde watertenkers en nagtelike afsluitings wat reeds vir maande duur. Sommige beskryf hul situasie as “gelyk aan Dag Zero”. Waterregte-organisasies waarsku ook dat Johannesburg reeds onder “Dag Zero”-toestande leef.
"I was supposed to go for a job interview but I couldn’t even bathe, we’ve had enough," says a Robertsham resident during the ongoing water protest in Ormonde, Johannesburg. #Water #WaterCrisis #Johannesburg #JohannesburgWater #Ormonde pic.twitter.com/fISzl9dZh5
— Salaamedia (@salaamedia) February 12, 2026
Johannesburg Water en die stadsbestuur erken dat die stelsel onder geweldige druk verkeer, maar ontken dat dit totaal ineengestort het. Hulle sê die oorsake is veelvoudig: ontwrigtings in grootmaatvoorsiening deur Rand Water, verouderende infrastruktuur, hoë aanvraag, groot lekkasies, wanbetaling van rekeninge en arbeidsonrus by Johannesburg Water.
’n “Water War Room” is intussen in die lewe geroep, met verteenwoordigers van die Stad, provinsiale en nasionale regering en Rand Water, om koördinering te verbeter en vinniger besluite te neem. Die minister van water en sanitasie, Pemmy Majodina, het hierdie week saam met ander amptenare onder meer die Brixton-reservoir besoek om die situasie te evalueer.
Majodina het vroeër gewaarsku dat sowat R400 miljard benodig word om munisipale waterinfrastruktuur landwyd op te knap - met geld wat tans nie beskikbaar is nie. Sy het die krisis deels toegeskryf aan munisipaliteite se onvermoë om infrastruktuur behoorlik te onderhou, en ’n tekort aan tegniese vaardighede.
WATCH | Minister of Water and Sanitation Pemmy Majodina says roughly R400 billion is needed to repair and upgrade water infrastructure at the local government level, funding that is currently unavailable. pic.twitter.com/yogudfr5QH
— SABC News (@SABCNews) February 11, 2026
Teen dié agtergrond het Lesufi Woensdag tydens ’n nuuskonferensie probeer beklemtoon dat ook leiers die ontberings ervaar. Hy het gesê hy moes in sommige gevalle na ’n hotel gaan om te stort sodat hy sy amptelike verpligtinge kon nakom.
“Ons kry nie spesiale water nie. Ons families ly saam met die gemeenskap,” het hy gesê.
Gauteng Premier Panyaza Lesufi said he also faces water shortages and is not special. “I had to go shower at a hotel…there is no special pipes.” @Sowetan1981 pic.twitter.com/u7ceYIVffE
— Koena Mashale (@Koena_xM) February 11, 2026
Die verwysing na ’n hotel het egter ’n storm van kritiek ontketen. Sosiale media het gegons van verontwaardiging, met inwoners wat daarop wys dat die meeste mense nie die finansiële middele het om hotelverblyf te bekostig nie. Een inwoner het tydens ’n protesaksie aan burgemeester Morero gesê: “Ruik my. Ek het 24 dae laas water gehad.”
— § (@EarthOddysey) February 11, 2026
Lesufi het later deur sy woordvoerder, Elijah Mhlanga, om verskoning gevra. Hy het erken dat sy opmerking as onsensitief geïnterpreteer kon word en gesê dat dit nooit sy bedoeling was om te suggereer dat die impak van die krisis verskil volgens sosiale status nie. “Niemand is immuun teen die frustrasie nie,” lui die verklaring.
Morero het intussen erken dat sommige inwoners toestande gelyk aan “Dag Zero” ervaar, maar hy hou vol dat ’n versnelde herstelplan in werking is wat herstel van lekke, beter monitering en waterbesparing insluit.
Hy het nie om verskoning gevra vir die munisipaliteit se hantering van die krisis nie en het eerder die klem geplaas op strukturele probleme wat oor jare opgebou het.
Amptenare versoek inwoners om streng bewaringsmaatreëls toe te pas. Tuine moet byvoorbeeld glad natgemaak word nie. Dit alles is nodig om verbruik onder 1 550 megaliter per dag te hou.
Tensions rising as a Brixton resident confronts Joburg Mayor Dada Morero during the press briefing, demanding answers on ongoing water outages and the lack of consistent supply. #nowaterjoburg #Ourcitynews #WaterCrisis #nowaterjhb/ MN pic.twitter.com/NJus0o3SLq
— Our City News (@OurCityNews) February 11, 2026
Die DA het aangekondig dat hulle Johannesburg Water en die Stad hof toe wil neem. Volgens Helen Zille word ’n bestaande omkeerstrategie van twee jaar gelede nie behoorlik geïmplementeer nie, en is daar ernstige vrae oor instandhouding en die moontlike bevoordeling van watertenkerverskaffers.
📌 Johannesburg residents cannot keep living without clean water.
⚖️ We’re taking Johannesburg Water to court to stop this ongoing water crisis and restore every resident’s right to clean water. Watch the full briefing: https://t.co/n4q3K2zn2u pic.twitter.com/sIbqE2pd8f
— Democratic Alliance (@Our_DA) February 11, 2026
Die DA voer aan dat die Stad grondwetlik verplig is om basiese dienste te lewer en dat inwoners nie verder die prys vir bestuursversuim kan betaal nie. Hulle oorweeg ook om nasionale ingryping te versoek.
Intussen neem gemeenskapsprotes toe. In Melville, Parktown-Wes, Greenside, Mayfair en Emmarentia het inwoners met leë emmers betoog en amptenare gekonfronteer.
Terwyl Lesufi se verskoning die onmiddellike storm dalk effens getemper het, bly die kernvraag onbeantwoord: Wanneer gaan Johannesburg se krane weer betroubaar vloei, en wie dra uiteindelik die verantwoordelikheid?
Vir baie inwoners is die krisis nie bloot ’n tegniese probleem nie, maar ’n simbool van vervalle infrastruktuur, gebrek aan politieke verantwoordbaarheid en ’n stad waar vertroue in plaaslike regering vinnig opdroog.
