Buitelanders wat werkvisums in Suid-Afrika het, asook toeriste wat aansoek gedoen het vir ’n verlenging van hulle visums en nog geen reaksie van die Departement Binnelandse Sake gekry het nie, kan ontspan.
Hulle huidige visums sal minstens tot die einde van die jaar geldig bly indien dit voor die tyd verval.
In sy eerste amptelike optrede as die nuwe minister van binnelandse sake, het Leon Schreiber van die DA binne net een dag nadat hy ingesweer is, die toegewing aan buitelandse burgers in Suid-Afrika wat nog op die uitslag van hul visumaansoeke wag, aangekondig.
Schreiber is een van ses DA-lede wat die afgelope week as minister ingehuldig is in president Cyril Ramaphosa se veelpartyregering.
The Department of Home Affairs (#DHA) welcomes the Minister of Home Affairs Dr @Leon_Schreib and Deputy Minister of Home Affairs Mr Njabulo Nzuza #DHAServiceDelivery @GCISMedia pic.twitter.com/q9Cnx3Nv6e
— HomeAffairsSA ???????? (@HomeAffairsSA) July 4, 2024
Die DA sê in ’n verklaring die vertragings by die departement het ’n krisispunt bereik, wat verwarring en frustrasie onder toeriste veroorsaak. Dit het ook voedingsgrond geskep vir korrupsie om te floreer. Die DA sê hulle het oor baie jare konsekwent gepleit dat die Departement van Binnelandse Sake billike en doeltreffende prosesse moet implementeer en uit die donker eeue moet beweeg.
Die DA se woordvoerder in die parlement, Werner Horn, sê hulle is bemoedig deur Schreiber se eerste amptelike handeling wat geleentheid bied vir die departement om die agterstand van meer as 92 000 visums wat tydens die vorige administrasie verkry is, aansienlik te verminder.
Hy sê die minister se onderneming sal sekerheid bring en die las vir buitelandse burgers wat op die uitslag van hul visum-, kwytskelding- en appèlaansoeke wag, verlig deur die tydelike visumtoegewing tot 31 Desember 2024 te verleng.
“Ons is vol vertroue dat die departement onder leiding van Schreiber in hierdie tydperk noodlenigingsplanne sal implementeer om die agterstand by die departement te verklein, maar ook ons sukkelende ekonomie sal versterk met die aantrekkingskrag van geskoolde buitelandse burgers, beleggings, toerisme en werkskepping op lang termyn.”
Die departement sê in ’n verklaring hoewel die departement werk om agterstande te verminder, daar steeds ’n agterstand in verskeie visum- en permitkategorieë is en Schreiber het nou opgetree om aansoekers te beskerm terwyl die agterstand verminder word.
New home affairs minister Leon Schreiber has pledged to address challenges plaguing the department with a determined and innovative approach. https://t.co/mVJ6ymn7Rw
— Sowetan LIVE (@SowetanLIVE) July 3, 2024
Die tydelike toegewing is van toepassing slegs op buitelandse burgers wat wettig in Suid-Afrika toegelaat is.
Hierdie vergunning is ook net van toepassing op aansoekers wat hul aansoeke via VFS Global ingedien het en wat ’n verifieerbare kwitansie vir sulke aansoeke van die VFS Global-opsporingstelsel kan toon.
Die departement sê die besluit sal help om nadelige gevolge te voorkom vir aansoekers wat poog om wettige visums te verkry om ’n bydrae in Suid-Afrika te lewer, hetsy as toeriste of deur hul vaardigheid as tydelike werkers.
Die departement sê terwyl hulle daartoe verbind is om die agterstand so gou moontlik uit te wis, onderneem die minister dat enige verdere uitbreiding of wysiging van die bepalings van hierdie toegewings voor die nuwe vervaldatum van 31 Desember 2024 skriftelik gekommunikeer sal word.
Die opdrag deur die departement stel verskeie maatreëls in.
Buitelandse nasionale visumhouers met hangende kwytskeldingsaansoeke vanaf 30 Junie 2024 sal ’n tydelike verlenging tot 31 Desember 2024 ontvang. Dit sal die departement in staat stel om hul aansoeke te verwerk en aan individue om aansoek te doen vir toepaslike visums. Hierdie visumhouers wat moet reis, maar wag op die uitslag van ’n kwytskeldingsaansoek, kan tot 31 Desember 2024 by ’n doeane uitgaan en weer binnegaan sonder om ongewens verklaar te word.
Langtermynvisumhouers (vir werk, besigheid, studie, familie en gades) wie se aansoeke hangende bly vanaf 30 Junie 2024, is ook tydelike verlengings toegestaan tot 31 Desember 2024. Hierdeur behou hulle hul huidige visumstatus. Hierdie buitelandse burgers mag nie aan aktiwiteite buite hul visumvoorwaardes deelneem nie. Hulle sal ook toegelaat word om die land uit te gaan en weer binne te kom sonder om ongewens verklaar te word.
Visumhouers wat geappelleer het teen ’n negatiewe besluit oor ’n langtermynvisumaansoek, sal ook ’n tydelike verlenging tot 31 Desember 2024 ontvang.
