Die parlementêre komitee oor polisie is gevra om te verseker dat die Suid-Afrikaanse Polisiediens (SAPD) sy ondersoek na die sogenaamde VBS-skandaal, waar miljoene rand na bewering by arm mense geplunder is, so gou moontlik voltooi.
Dit volg nadat twee van die beskuldigdes in die VBS Mutual Bank-aangeleentheid, Danny Msiza en Kabelo Matsepe, weer Woensdag in die Pretoriase hooggeregshof verskyn het. Daar is 12 beskuldigdes in die saak, maar verskeie ander bekendes wat na bewering ook betrokke was, loop nog vry rond.
Msiza is die voormalige tesourier van die ANC in Limpopo en Matsepe ’n voormalige jeugligaleier. Hulle word daarvan beskuldig dat hulle deposito’s deur verskeie munisipaliteite by VBS Mutual Bank aangevra het.
Hulle wil ’n tydelike opskorting van vervolging hê en vra ook dat hulle sake van die ander beskuldigdes geskei word.
Shaun Abrahams, voormalige NVG-baas, het die aansoek namens Matsepe en Msiza gedoen en gesê dit sal in die belang van geregtigheid wees om te verseker dat hulle nie benadeel word nie.
Die twee het ook ’n hangende aansoek om teen ’n vorige uitspraak te appelleer, wat verband hou met die ondersoek na die VBS-skandaal.
Die DA se adjunkhoofsweep, Baxolile Nodada, sê in ’n verklaring geregtigheid wat vertraag word, is geregtigheid wat ontken word. Dit is nou tyd vir resultate. Daarom het die DA die parlementêre komitee oor polisie gevra om te verseker dat die SAPD sy ondersoek so gou moontlik voltooi.
Die DA het sy oproep om geregtigheid in die VBS-plunderskandaal tydens ’n media-inligtingsessie by die Pretoriase hooggeregshof, waar die voorverhoor in die VBS-saak plaasvind, herhaal.
????Justice for victims of EFF looters! Today, the DA is outside the North Gauteng High Court to protest against the VBS scandal perpetrators. These corrupt politicians have stolen pensioners' savings & municipal funds to fund their lavish lifestyles. The DA demands accountability! pic.twitter.com/NVltKerwrU
— Democratic Alliance (@Our_DA) August 14, 2024
“Ses jaar nadat die skandaal uitgebreek het, eis die DA dat dit tyd is dat diegene wat verantwoordelik is, aanspreeklik gehou word, insluitend politici wat na bewering by dié misdaad baat gevind het.”
Ondersoeke na die VBS-skandaal het in 2018 na bewering wydverspreide plundering deur bankamptenare en politici, insluitend, na bewering, senior leiers van die EFF, Floyd Shivambu en Julius Malema, blootgelê. Byna ses jaar later is die politici wat na bewering daarby betrokke was, steeds op vrye voet terwyl daar kriminele vervolging teen VBS-amptenare was.
Volgens die DA skep dit ernstige kommer oor die pas van geregtigheid indien politici wat na bewering betrokke was, ongedeerd daarmee wegkom.
Nodada sê die DA was meedoënloos in sy strewe na aanspreeklikheid. “In Oktober 2018 het ons kriminele klagte aanhangig gemaak teen 50 individue wat in die Suid-Afrikaanse Reserwebank (SARB) se forensiese verslag genoem word. In November 2018 het ons Floyd Shivambu en Julius Malema daarvan aangekla dat hulle R1,8 miljoen van VBS aanvaar het. Die Suid-Afrikaanse Polisiediens (SAPD) moet egter nog sy ondersoeke voltooi.”
Hierdie vertraging is volgens die DA onaanvaarbaar en die polisieportefeuljekomitee moet nou hulle oorsigrol vervul en verseker dat hierdie ondersoeke afgehandel word.
“Terwyl ons die aanklagte teen VBS-amptenare verwelkom, is ons diep bekommerd oor die gebrek aan vordering met die arrestasie van die politici waarteen bewerings gemaak is. Die DA het getuienis gelewer, insluitend getuienis van Tshifhiwa Matodzi, ’n sleutelfiguur in die VBS-skandaal, dat Shivambu en Malema betrokke was by die bedrog van VBS Bank en sy kwesbare kliënte,” sê die DA in hulle verklaring.
Die DA het die beweerde diefstal van pensioenarisse se geld en die beweerde gebruik van plaaslike regeringsfondse om korrupte politici en amptenare te ondersteun, veroordeel. “Hierdie misbruik van openbare vertroue, veral met geld van die mees kwesbares, is onaanvaarbaar. Diegene wat vir hierdie projek verantwoordelik is, moet ondervra word.”
As ’n organisasie wat die oppergesag van die reg handhaaf, is die DA volgens hulle daarop ingestel om korrupsie te bekamp en goeie gedrag in openbare instellings te bevorder. “Korrupsie is nie ’n lukrake misdaad nie, dit raak mense se lewens.”
Die DA sê hulle sal nou uitreik na die VBS Belanghebbendesforum om slagoffers te ondersteun en by te staan in hul herstelproses.
