Ontworpen, beheerd en onderhouden door LitNet

Home > Actueel > In het nieuws

Slegs 20% van graad 3-leerlinge kan met  begrip lees

Jean Oosthuizen In het nieuws 2025-02-28
  • 0
Shares0LinkedIn0Pin0Print0

Die onvermoë van Suid-Afrikaanse kinders om met begrip te lees het ’n skokkende hoogtepunt bereik. Slegs 20% van graad 3-leerlinge in Suid-Afrika kan met  begrip lees. Dit beteken 80% van hierdie kinders kan geen taal met begrip lees nie.

Dit blyk uit die 2030-Leespaneel se verslag wat die afgelope week in Johannesburg vrygestel is.

Hierdie statistiek is ’n duidelike aanduiding van ’n aanhoudende krisis in die land se onderwysstelsel, veral wat geletterdheid betref. Die paneel, wat uit 18 vooraanstaande Suid-Afrikaners bestaan en jaarliks vordering dophou om te verseker dat kinders teen 2030 op tienjarige ouderdom met begrip sal kan lees, het gewaarsku dat die huidige tempo van verbetering te stadig is. Hulle skat dat dit dekades kan neem om die nasionale doelwit te bereik as drastiese stappe nie nou gedoen word nie.

Die paneel, byeengeroep deur voormalige adjunkpresident Phumzile Mlambo-Ngcuka, poog om die vraag te beantwoord: “Wat moet verander word om te verseker dat alle kinders teen 2030 leer lees?”

Teen die huidige tempo van vordering sal alle kinders in Suid-Afrika eers teen 2098 in enige taal met begrip kan lees. In sy 2019-staatsrede het president Cyril Ramaphosa die doelwit gestel dat “ons skole beter opvoedkundige uitkomste sal hê en elke 10-jarige in staat sal wees om teen 2030 met begrip te kan lees”.

Kenners beskryf die situasie as “katastrofies” vir ’n land wat 7% van sy begroting aan onderwys bestee, maar nog geen duidelike nasionale plan het om die agterstand in te haal nie.

“Ons kinders verdien beter as ’n stelsel wat hulle so vroeg reeds in die steek laat,” het ’n paneellid tydens die bekendstelling gesê.

“Die data is duidelik: As ons nie nou optree nie, sal ons hierdie generasie verlore,” waarsku ’n onderwyskenner wat by die verslag betrokke was.

Die paneel het ’n dringende oproep aan die Departement van Basiese Onderwys gerig om ’n omvattende, begrote plan te ontwikkel om hierdie leeragterstande hok te slaan. Hulle beklemtoon dat vroeë ingryping, veral in graad 1 en 2, kritiek is om kinders se basiese leesvaardighede te versterk, voordat die oorgang na Engelse onderrig in graad 4 plaasvind. Sonder sulke maatreëls, waarsku kenners, sal die ekonomiese en sosiale impak van ongeletterdheid aanhou groei

Hierdie probleem is nie nuut nie. Die jongste bevindings bou voort op vroeëre studies, soos die 2021 Progress in International Reading Literacy Study (PIRLS), wat aangetoon het dat 81% van graad 4-leerders nie met begrip kon lees nie. Die effense verskil tussen die 80% vir graad 3 en 81% vir graad 4 dui daarop dat die probleem reeds vroeg in die onderwysstelsel begin en nie aansienlik verbeter namate kinders vorder nie. Die PIRLS-studie het Suid-Afrika se telling op 288 geplaas, ver onder die internasionale gemiddeld, en het ’n agteruitgang getoon vanaf 320 in 2016. Die Covid-tyd het die situasie vererger, met skoolsluitings en roterende roosters wat veral armer gemeenskappe geraak het.

Volgens die Leespaneel se verslag is daar verskeie oorsake vir hierdie krisis. Baie leerders ontvang nie voldoende onderrig in hul moedertaal tydens die vroeë skooljare nie, wat die grondslag vir latere leesvaardighede verswak. Boonop is daar ’n tekort aan opgeleide onderwysers, swak skoolinfrastruktuur, en beperkte toegang tot boeke in huishoudings. Die verslag meld ook dat meisies beter presteer as seuns, met ’n gaping van ongeveer anderhalf jaar in leesvlak, maar selfs hierdie groep bly ver agter internasionale standaarde.

Om alle kinders te kry om met begrip te lees, sal ’n langtermynproses wees, met volgehoue ​​fokus op ’n enkele saak, naamlik om met begrip te lees.

Shares0LinkedIn0Pin0Print0
  • 0
Verified by MonsterInsights
Top