President Cyril Ramaphosa het Suid-Afrikaners wat oor minder as ’n week nuwe plaaslike owerhede moet kies, aangemoedig om volgende Maandag hulle burgerlike plig na te kom en te gaan stem.

Suid-Afrikaners gaan volgende Maandag, op 1 November, na die stembus om hul plaaslike verteenwoordigers te kies.

Ramaphosa sê in sy weeklikse nuusbrief aan die land se inwoners hierdie verkiesings is ’n geleentheid vir mense om hul stem te laat hoor oor die dringendste kwessies wat hul daaglikse lewe raak. Dit is ook ’n geleentheid om verkose verteenwoordigers aanspreeklik te hou vir die beloftes wat hulle aan gemeenskappe gemaak het.

From The Desk of The President - Monday, 25 October 2021 - https://t.co/Xn0LXvIVXj In exactly one week from today, South Africans will go to the polls to elect their local representatives. pic.twitter.com/m3cA4OUIwc

— Presidency | South Africa ?? (@PresidencyZA) October 25, 2021

“Hierdie verkiesings handel oor die wesenlike kwessies wat die belangrikste vir mense is, soos toegang tot water en elektrisiteit, behoorlik funksionele hospitale en klinieke, veiligheid en sekuriteit wat gewaarborg word deur ’n doeltreffende polisiediens, goed-onderhoude paaie en openbare skole met goeie hulpbronne.”

Ramaphosa sê dit is die “brood-en-botter-kwessies” waarvan Amilcar Cabral in 1965 geskryf het toe hy gesê het dat mense nie vir idees veg nie, maar “om materiële voordele te behaal, om beter en in vrede te leef, om hul lewens te sien vooruitgaan en hulle kinders se toekoms te waarborg”.

“Om hierdie rede is dit uiters belangrik dat Suid-Afrikaners hul burgerlike plig om tydens plaaslike regeringsverkiesings te stem, met dieselfde entoesiasme moet benader as waarmee hulle in nasionale en provinsiale verkiesings stem,” sê Ramaphosa.

Kiesers moet volgende week landwyd uit meer as 94 000 kandidate (wat benewens dié van politieke partye ook onafhanklike kandidate insluit) kies wie hulle op plaaslike vlak gaan verteenwoordig.

Die feit dat baie van die verkiesingsplakkate op straatpale en advertensieborde vir  partye en kandidate is wat nie voorheen aan plaaslikeregeringsverkiesings deelgeneem het nie, is volgens Ramaphosa ’n teken dat die land se demokrasie gesond is.

“Die land bevind hom in ’n uiters moeilike tyd. Die COVID-19-pandemie het ons ekonomiese situasie aansienlik vererger. As ons die land weer op dreef wil kry, het ons mense aan die stuur nodig wat nie net bekwaam, ervare en gekwalifiseerd is nie, maar ook eerlik en betroubaar is,” sê Ramaphosa in sy nuusbrief.

Die President sê die land het plaaslike raadslede nodig wat ’n duidelike plan het om beleggings en sakegeleenthede in hul omgewing te bevorder. Hulle moet verstaan ​​dat munisipale dienste betroubaar en bekostigbaar gelewer moet word om die lewens van inwoners te verbeter en om te verseker dat ondernemings kan funksioneer en floreer.

Raadslede moet volgens Ramaphosa die bemagtiging van jongmense en vroue prioritiseer. Hy sê indien nodig moet hulle die plaaslike verordeninge en regulasies verander sodat hulle maklik besighede kan stig, toegang tot munisipale verkrygingsgeleenthede kan kry en opleiding en ander ondersteuning kan ontvang.

“Ons het nie kandidate nodig wat tydens die verkiesingstyd beloftes aan gemeenskappe maak en kort daarna verdwyn nie.

“Waar ek ook al die afgelope paar weke in die land gereis het, het ek gehoor van raadslede wat toegewyd en beskikbaar is en wat hul beloftes nakom. Ek het egter ook gehoor van mense se frustrasie met raadslede wat nie toeganklik is nie en wat nie aandag gee aan hul griewe nie.”

Ramaphosa sê sonder aanspreeklikheid van verkose verteenwoordigers en openbare amptenare, hetsy op nasionale, provinsiale of plaaslike vlak, word vertroue tussen die publiek en die regering maklik verbreek wat moeilik herwin kan word.

“Ons benodig groter openheid en betrokkenheid by gemeenskappe deur die verkose amptenare. Dit is ons hoop dat diegene wat hierdie jaar verkies word, die saak van aanspreeklikheid ernstig sal opneem.”

Ramaphosa sê uiteindelik gaan elke verkiesing oor vertroue.

“Kiesers het ’n verwagting dat die beloftes wat aan hulle gemaak word, nagekom word. Terselfdertyd verwag verkose amptenare dat gemeenskappe saam met hulle moet werk om die kwessies in ’n bepaalde wyk op te los. Dit is ’n kwessie van wedersydse verantwoordelikheid, want beide raadslede en gemeenskappe deel ’n algemene strewe om die lewensgehalte van almal te verbeter.”

Ramaphosa het ’n beroep op alle Suid-Afrikaners gedoen om saam te werk met wie ook al verkies word, ongeag aan watter politieke party hulle behoort.

Hy sê Suid-Afrikaners het dalk verskillende politieke voorkeure maar uiteindelik wil almal ’n land sien wat ’n beter toekoms vir hulle en hulle kinders bied.

“Laat ons verantwoordelik stem. Laat ons wys stem. Laat ons onthou dat dit slegs diegene is wat die beste belang van die Suid-Afrikaanse mense op die hart dra wat ons stem moet kry.”