Die Suid-Afrikaanse ekonomie is volgens alle aanduidings stadig maar seker besig om weer sy kop op te tel.
Die land se ekonomie het in die tweede kwartaal (April–Junie) met 0,4% gegroei. Ekonome meen sakevertroue kan in die derde kwartaal nog verder verbeter, weens die verlengde opskorting van beurtkrag en groter politieke stabiliteit danksy die regering van nasionale eenheid ná die verkiesing vroeër vanjaar.
🧵 The South African #economy grew by 0,4% in the second quarter of 2024.
Read more here: https://t.co/k5ykIUc4SZ
#StatsSA #ZAGDP pic.twitter.com/eC9i9Wt5OJ— Stats SA (@StatsSA) September 3, 2024
Daar was ook ’n afwaartse neiging in die inflasiekoers die afgelope maand. Verbruikersprysinflasie het in Julie tot ’n driejaarlaagtepunt van 4,6% gedaal vanaf 5,1% in Junie. Die koers in Julie was die laagste sedert Desember 2023 (4,0%).
Laer pryse is aangeteken vir ’n aantal produkte, en veral vir voedsel en niealkoholiese drankies, vervoer, behuising en nutsdienste.
Verskeie sektore het in die tweede kwartaal van 2024 positiewe winste behaal vergeleke met die eerste kwartaal. Dit sluit in vervaardiging, elektrisiteitsopwekking, konstruksie (geboue wat aan groter munisipaliteite as voltooi gerapporteer word), groothandel, kleinhandel, toeristeverblyf en passasiersvervoer per spoor.
Statistiek SA het Dinsdag BBP-data vir die tweede kwartaal van die jaar gepubliseer en gesê dat die bedrywe wat die meeste tot groei in die tweede kwartaal bygedra het, finansies, eiendom en sakedienste was. Die sektore het met 1,3% toegeneem e 0,3 persentasiepunte tot die algehele groei bygedra.
There was a build-up in inventories in Q2:2024. Large inventory build-ups were reported for trade, manufacturing and finance in Q2:2024.
Read more here: https://t.co/k5ykIUcCIx#StatsSA #economy #ZAGDP pic.twitter.com/gj9GIINOPM
— Stats SA (@StatsSA) September 3, 2024
Die land het in die tweede kwartaal geen beurtkrag ervaar nie, wat die elektrisiteit-, gas- en watervoorsieningsbedryf gehelp het. Dit het met 3,1% gegroei, aangedryf deur verhoogde elektrisiteitsopwekking en waterverspreiding.
As mens die moeilike ekonomiese omgewing wat deur die pandemie in 2020 veroorsaak is, ignoreer, verteenwoordig die groeikoers van 3,1% volgens Statistieke SA die skerpste toename sedert die derde kwartaal van 2008.
Die konstruksiebedryf het ’n mate van groei getoon na ’n jaar van daling, en het effens hoër in die tweede kwartaal gegroei. Die styging is aangedryf deur ekonomiese aktiwiteit wat verband hou met residensiële en nieresidensiële geboue. Daar was egter ’n verlangsaming in ander konstruksiewerke.
Drie bedrywe het in die tweede kwartaal gekrimp. Vervoer, berging en kommunikasie was die grootste negatiewe bydraers. Die sektore het met 2,2% gedaal en het dus die BBP met 0,2 van ’n persentasiepunt laer getrek. Stakings en ’n daling in vragvolumes het tot die bedryf se swak prestasie bygedra.
Landbou, bosbou en visserye het ook teenspoed in die gesig gestaar, insluitend laer as verwagte reënval in sommige dele van die land (wat mielie- en sojaboonproduksie beïnvloed), swaar reën in KwaZulu-Natal (wat suikerrietproduksie beïnvloed), en bek-en-klouseer wat skaap- en varkvleisproduksie affekteer het.
Mynbou het ’n tweede agtereenvolgende daling getoon. Die bedryf se swak vertoning in die tweede kwartaal word geassosieer met verminderde produksie van ystererts, steenkool, diamante en goud. Mynbouproduksie het met 0,9% gedaal. Die bedryf het meer platinumgroepmetale, chroomerts, nikkel, mangaanerts en koper geproduseer, maar dit was nie genoeg om die bedryf in ’n opwaartse groeikoerstrajek te plaas nie.
Ander sektore wat ’n swakker kwartaal beleef het, is die motorhandel, restaurante, spyseniering en kitskos, vragvervoer (spoor en pad) en padpassasiersvervoer.
Die motorhandelsektor se flouer vertoning word toegeskryf aan ’n afname in verkope van brandstof, bykomstighede, nuwe voertuie en handelsware van geriefswinkels. Werkswinkelinkomste en verkope van gebruikte voertuie was egter positief.
Die amptelike werkloosheidskoers het in die tweede kwartaal tot 33,5% gestyg, die hoogste sedert die tweede kwartaal van 2022 toe dit 33,9% was. Die arbeidsmark het na raming 92 000 poste verloor, terwyl die aantal werkloses met 158 000 toegeneem het.
Die bedrywe wat werkverliese aangeteken het, sluit in handel, landbou, private huishoudings, konstruksie en finansies. Vervaardiging, gemeenskaps- en maatskaplike dienste, nutsdienste, vervoer en mynbou het ’n toename in die aantal werknemers ondervind.
