Die DA het ’n ope brief aan die Wêreld Anti-Dwelmagentskap (WADA) gerig om te probeer keer dat die Suid-Afrikaanse vlag nie later vandeesmaand by die rugby- en krieket-wêreldbekertoernooie vertoon mag word nie.

Dit volg nadat die regering versuim het om die sperdatum te haal vir die wysiging van die verouderde Wet op Dwelmvrye Sport om aan die jongste wêreldwye anti-dwelmkode (WADA) te voldoen.

In ’n brief gerig aan die Wêreld Anti-Dwelmagentskap het die DA sy kommer uitgespreek oor die regering se voortgesette nie-nakoming van die WADA-kode.

Die kode het reeds in Januarie 2021 in werking getree. Die DA sê in ’n verklaring hierdie aanhoudende nie-nakoming laat ernstige vrae ontstaan ​​oor Suid-Afrika se verbintenis tot skoon en etiese sportpraktyke.

Indien Suid-Afrika nie aan die kode voldoen nie, sal die Suid-Afrikaanse vlag nie later vandeesmaand by die rugby- en krieket-wêreldbekertoernooie vertoon mag word nie.

Die minister van sport, kuns en kultuur, Zizi Kodwa, sou die media Dinsdag inlig oor aksies wat die regering onderneem het sedert die WADA aanbeveel het dat huidige Suid-Afrikaanse wetgewing nie aan die 2021-wêreldwye anti-dwelmkode voldoen nie.

Die verbod sal hierdie Saterdag in werking tree, die dag voor Suid-Afrika se kwarteindstryd met die gasheer Frankryk in Parys, tensy hulle binne dieselfde tyd ’n appèl by die Hof vir Arbitrasie in Sport (CAS) kan indien.

Die WADA het verlede maand die gevolge vir die eerste keer aangekondig en Suid-Afrika gewaarsku dat hy steeds nie aan die “verpligte voldoening” van die hersiene kode voldoen het nie, wat op 1 Januarie 2021 in werking getree het. Daar word van alle lidlande verwag om daaraan te voldoen. Suid-Afrika se finale sperdatum is 13 Oktober.

Suid-Afrika en Bermuda is die enigste twee nasionale anti-dopingorganisasies (NADOS) uit meer as 200 wat nog nie aan die nuwe kode voldoen nie. Een van die belangrikste gevolge van nie-nakoming is om nie toegelaat te word om onder ’n nasionale vlag aan groot sportbyeenkomste, insluitend die Olimpiese Spele, deel te neem nie.

Beide Suid-Afrika se rugby- en krieketspanne speel tans by dié onderskeie wêreldbekertoernooie.

Die kode is deur die WADA se uitvoerende komitee goedgekeur by die wêreldkonferensie oor anti-dwelmgebruik in sport op 7 November 2019 en is van krag vanaf 1 Januarie 2021.

Ten spyte van herhaalde waarskuwings deur opposisiepartye in die parlement, het Suid-Afrika voortdurend versuim om die kode te implementeer.

Die DA se nasionale woordvoerder, Solly Malatsi, sê dit toon ’n algehele gebrek aan aanspreeklikheid en versuim van die ANC se pligte om behoorlike nakoming in sport te verseker wanneer dit kom by anti-dwelmaangeleenthede.

Khalid Galant, die hoof uitvoerende beampte van die Suid-Afrikaanse Instituut vir Dwelmvrye Sport, die nasionale anti-dwelmliggaam, het verlede Donderdag gesê hy sal waarskynlik teen die sperdatum van 13 Oktober na die Hof van Arbitrasie in Sport appelleer om te verseker dat die sanksies nie in werking tree nie. Die sanksies sal dan hopelik opgeskort word totdat óf die appèl beslis is óf Suid-Afrika aan die WADA se vereistes voldoen.

Malatsi sê die doel van sy brief, in sy hoedanigheid as ’n parlementslid, is om te voldoen aan die vereiste om die kode in nasionale wetgewing te implementeer.

Hy sê in sy brief dit is onmoontlik om die nodige wetgewing te wysig om uitvoering te gee aan die kode voor die sperdatum van 13 Oktober 2023.

“Ons versoek egter ’n toegewing van die Voldoeningshersieningskomitee om Suid-Afrika ’n verdere vier maande toe te laat, tot 22 Januarie 2024, om te verseker dat ons wetgewing in lyn is met die kode.”