Suid-Afrika steeds opgeskeep met "nuttelose" entstof uit Indië

  • 0

Suid-Afrika sit op die vooraand van ’n massiewe landwye inentingsveldtog teen COVID-19 steeds opgeskeep met die een miljoen dosisse AstraZeneca-entstof uit Indië waarmee plaaslik niks uitgerig kan word nie.

’n Koerant in Indië, The Economic Times, het Dinsdag berig dat Suid-Afrika die Seruminstituut in Indië gevra het om die entstof, wat met groot fanfare in die land aangekom het, terug te neem.

Suid-Afrika ontken egter dat hy die entstof na Indië wil terugstuur.

Die besluit om die entstof terug te stuur sou volgens die koerant in Indië volg nadat die regering die gebruik van die AstraZeneca-entstof opgeskort het. Die entstof bied slegs beperkte beskerming (mbt ligte tot matige COVID-19) teen die Suid-Afrikaanse variant van die virus. Dit is gegrond op inligting van ’n studie van die Universiteit van die Witwatersrand en Oxford-universiteit in die Verenigde Koninkryk.

Nog 500 000 dosisse van die AstraZeneca-entstof sou binne die volgende paar weke in Suid-Afrika aangekom het. The Economic Times berig dat die Wêreldgesondheidsorganisasie (WGO) intussen die AstraZeneca-entstof vir noodgebruik goedgekeur het. Die entstof is slegs 22% doeltreffend teen die Suid-Afrikaanse variant van die virus.

Intussen het Suid-Afrika besluit om die entstof van Johnson & Johnson te gebruik as deel van ’n navorsingsimplementeringstudie. Die eerste inentings sal reeds dié week plaasvind, maar dit is nog nie duidelik presies waar en wanneer nie. Netwerk24 berig dat die eerste besending (vermoedelik 80 000 dosisse vir gesondheidswerkers) van die Johnson & Johnson (J&J)-entstof het Dinsdagaand by die OR Tambo-lughawe in Kempton Park arriveer. Dit is oornag na 20 entstof-sentrums in elke provinsie versprei.

Die webwerf Polity het Dinsdag berig dat Suid-Afrika die een miljoen dosisse AstraZeneca wat nie meer in Suid-Afrika gebruik gaan word nie, met ander Afrikalande “deel” deur middel van die Afrika-unie. 

Volgens die webwerf het die adjunk-direkteur-generaal van gesondheid, Anban Pillay, aan Reuters gesê dit is nie waar dat Suid-Afrika die Seruminstituut in Indië gevra het om die een miljoen dosisse AstraZeneca terug te neem soos wat The Economic Times berig het nie.

Volgens hom beplan Suid-Afrika om die geld wat daarop spandeer is, op een of ander manier te verhaal, maar is nog besig om te besluit hoe om dit te doen.

Die minister van gesondheid, Zweli Mkhize, het vroeër gesê die land sal probeer om dosisse van die entstof te verkoop aan lande wat dit kan gebruik. Netwerk24 berig dat die regering het die voorraad aan die Afrika-unie aangebied.

Die Minister het ook verlede week samesprekings gevoer met die WGO om die pad vorentoe te bespreek in die lig van die bevindings dat AstraZeneca ondoeltreffend is vir Suid-Afrikaanse gebruik.

Op ’n vraag aan die Minister wat word van die geld wat gebruik is om vir AstraZeneca te betaal, het Mkhize gesê daar word nie beplan om dit te probeer terugeis nie. ‟Ons beoog om dit volgens die advies van kundiges te gebruik,” het hy toe gesê.

Volgens die Sondagkoerant Rapport broei daar boonop ’n twis tussen Suid-Afrika en Indië oor die omstrede AstraZeneca-entstof. Afgesien van die oneffektiwiteit daarvan vir die Suid-Afrikaanse variant van die virus, verval die entstof wat in die land aangekom het, reeds in April. Indië weier glo om die besending te vervang met entstowwe wat langer hou.

Die Departement van Gesondheid sê intussen die vervaardigers van Rusland se Sputnik V-entstof het dokumentasie by die Suid-Afrikaanse reguleringsowerheid vir gesondheidsprodukte, Sahpra, ingedien vir registrasie. Die departement sê wetenskaplikes is besig om die entstof deeglik te ontleed te midde van kommer oor die impak van een van die komponente van die entstof op gemeenskappe waar daar ’n hoë voorkoms van die MI-virus is.

  • 0
Top