Suid-Afrikaners sit met opgehoue asems om te sien wat die uitkoms gaan wees van môre (Woensdag) se vergadering in die Withuis in Washington tussen president Donald Trump en president Cyril Ramaphosa.
Ramaphosa en sy afvaardiging se besoek hierdie week aan die VSA geskied te midde van ernstige diplomatieke spanning tussen die twee lande. Daar word wyd gegis oor die afloop van Woensdag se ontmoeting tussen die twee presidente.
Die Suid-Afrikaanse afvaardiging word gelei deur Ramaphosa en sluit minstens vier kabinetsministers in, onder wie die leier van die DA, John Steenhuisen in sy hoedanigheid as minister van landbou. Die lede van Ramaphosa se span wat van Maandag tot Donderdag in die VSA sal wees, is onder andere Ronald Lamola (minister van internasionale betrekkinge en samewerking), Khumbudzo Ntshavheni (minister in die presidensie) en Parks Tau (minister van handel, nywerheid).
🇿🇦His Excellency President @CyrilRamaphosa is leaving for the United States of America where he is embarking on a working visit from 19- 22 May 2025.
The President will meet President Donald Trump at the White House in Washington DC to discuss bilateral, regional and global… pic.twitter.com/GhWJnCmaxr
— The Presidency 🇿🇦 (@PresidencyZA) May 18, 2025
Hierdie ontmoeting, wat van 19 tot 22 Mei 2025 plaasvind, word deur die Suid-Afrikaanse presidensie beskryf as ’n geleentheid om die strategiese verhouding tussen die twee lande te “herstel” te midde van versuurde diplomatieke bande sedert Trump se terugkeer na die Withuis in Januarie 2025.
Die spanning spruit uit verskeie kwessies, insluitend grondhervorming en die Onteieningswet, asook Suid-Afrika se klag by die Internasionale Strafhof in Den Haag teen Israel, wat een van Amerika se groot bondgenote is.
Trump se administrasie het beswaar gemaak teen Suid-Afrika se Strafhof-saak teen Israel, waar Suid-Afrika Israel van volksmoord in Gaza beskuldig. Ramaphosa se betrokkenheid by die “Den Haag-groep”, ’n koalisie van lande wat Israel se optrede kritiseer, het verdere wrywing veroorsaak. Die ANC hou egter vol dat sy buitelandse beleid, insluitend verhoudings met lande soos Iran, nie hersien sal word om die VSA te paai nie.
Nog ’n item op Woensdag se agenda sal ongetwyfeld Trump se bewering wees dat wit Suid-Afrikaners volksmoord in die gesig staar, as gevolg van hul ras aangerand en vermoor word, en dat boere se grond hulle sonder vergoeding ontneem word.
Trump se uitvoerende bevel op 7 Februarie 2025 het alle Amerikaanse finansiële hulp aan Suid-Afrika opgeskort. Ramaphosa beplan om hierdie kwessies aan te spreek en te verduidelik dat die Onteieningswet wet nie diskriminerend is nie en dat dit bedoel is om historiese ongelykhede reg te stel.
Die ontmoeting word beskou as ’n kritieke oomblik vir Suid-Afrika-VSA-verhoudings, wat op hul laagste punt is sedert die einde van apartheid. X-plasings weerspieël gemengde sentimente, met sommige wat twyfel of die vergadering rasioneel sal wees weens Trump se aggressiewe retoriek. AfriForum en Solidariteit, twee organisasies wat Afrikanerbelange verteenwoordig, het aangedui dat hulle hoop dat Ramaphosa kwessies soos die Onteieningswet en ander wette sal aanspreek.
Good luck President Ramaphosa on your meeting with President Trump, kindly protect our national interests at all costs. pic.twitter.com/cXDARVAGOQ
— A Marxist-Leninist ★☭ (@Absolute_Kganki) May 18, 2025
John Steenhuisen (ook leier van die DA) sê die hoogste kwessies op sy prioriteitslys sal wees om handelsbetrekkinge tussen die VSA en Suid-Afrika te verseker, veral in die landbou, om werksgeleenthede te beskerm en uit te brei en die ekonomie te laat groei.
Steenhuisen sê in ’n verklaring Suid-Afrika se verhouding met die VSA is een van uiterste belang. Voorkeurhandelsooreenkomste soos Agoa dra aansienlik by tot Suid-Afrika se ekonomie. “Om hierdie voordele te verloor, sal rampspoedig wees vir boere, plaaswerkers en die ekonomie in sy geheel,” het Steenhuisen gesê.
Hy sê verhoudings tussen lande is nooit eenvoudig nie. “Ons kan nie voorgee dat ons nie unieke uitdagings in ons land in die gesig staar nie. Hierdie afvaardiging na Washington, DC verteenwoordig alle Suid-Afrikaners wat dit aan ons toevertrou het om die gedeelde nasionale belange en ’n begeerte vir ekonomiese groei en werkskepping eerste te stel, bo enige party- of ideologiese posisies.”
Steenhuisen het aan Newzroom Afrika gesê: “Dit is ’n goeie geleentheid vir president Cyril Ramaphosa om die verkeerde inligting oor Suid-Afrika uit die weg te ruim. Daar is geen volksmoord nie, daar is geen onteiening van plase sonder vergoeding in Suid-Afrika nie.”
[WATCH] "It is a good opportunity for President Cyril Ramaphosa to dispel the misinformation about South Africa. There is no genocide, there's no expropriation of farms without compensation in South Africa." - Agriculture Minister John Steenhuisen on Ramaphosa's working visit to… pic.twitter.com/brkFPm3Obt
— Newzroom Afrika (@Newzroom405) May 16, 2025
Ramaphosa, wat ondervinding het as ’n onderhandelaar tydens Suid-Afrika se oorgang vanaf apartheid, benader die vergadering met ’n strategie om ’n “ooreenkoms” met Trump te sluit, geïnspireer deur Nelson Mandela se onderhandelingsbenadering. Hy het beklemtoon dat Suid-Afrika gefokus sal bly op sy eie belange en nie sal afwyk van sy beginsels nie.
