Zandra Bezuidenhout het ná 'n loopbaan in die onderwys haar nagraadse studies in die Afrikaanse en Nederlandse letterkunde aan die Universiteite van Stellenbosch en Leiden hervat. Van 1992 tot 2004 werk sy as assistent en navorser by die Departemente Afrikaans en Nederlands en Opvoedkunde aan die US In 2005 verwerf sy 'n doktorsgraad aan die US onder leiding van prof Dorothea van Zyl, met 'n proefskrif getiteld Sosio-literêre perspektiewe op die eietydse digkuns van vroue in die Afrikaanse en Nederlandse taalgebiede.

Haar poësiedebuut, Dansmusieke, is in 2001 met die Ingrid Jonkerprys bekroon en 'n tweede digbundel, Aardling, het in 2006 verskyn. Van haar kortverhale is in literêre tydskrifte gepubliseer.

Haar belangstelling in die literatuur sentreer rondom die poësie, en meer bepaald die wisselwerking tussen teks en konteks.

Foto: Naomi Bruwer