Mboweni tree vir Zuma in die bres

  • 0

Die minister van finansies, Tito Mboweni, het hom die afgelope week vir die tweede keer binne een dag in omstredenheid gehul met nog een van sy talle omstrede uitlatings op Twitter.

In sy jongste boodskap, wat wye reaksie uitlok, tree hy in die bres vir oudpresident Jacob Zuma. Mboweni het gesê wat ook al Zuma se tekortkominge mag wees, glo hy nie dat Zuma die vryhede in die land waarvoor daar hard geveg is, wil ondermyn nie.

Dit volg na Zuma se blatante minagting van die Konstitusionele Hof-beslissing dat hy voor die Zondokommissie moet verskyn en Zuma se volgehoue weiering om dit te doen.

Mboweni sê in sy plasing op Twitter hy en Zuma was saam in die “deep deep underground”. “Ek dink nie hy wil die vryheid waarvoor ons hard geveg het, ondermyn nie. Ek ken hom. Ek het hom die eerste keer in Lesotho ontmoet tydens moeilike tye. Harde tye.”

Mboweni se twiet het onmiddellik uiteenlopende reaksies op Twitter uitgelok. Die Zuma-faksie het hom geprys vir sy steun aan die voormalige president, terwyl Zuma se teenstanders hom ernstig voor stok gekry het.

Vroeër dieselfde dag (Woensdag) moes Mboweni verskoning vra vir een van sy twiets toe ’n omstander deur die polisie doodgeskiet is gedurende ’n protesaksie deur studente van Wits-universiteit oor die beweerde finansiële uitsluiting van studente.

Die 35-jarige Mthokozisi Ntumba is Woensdagoggend dood nadat hy in kruisvuur beland het terwyl die polisie ’n betoging deur studente in bedwang wou bring.

Kort na die voorval het Mboweni getwiet volgens inligting tot sy beskikking is daar nie ’n student wat gedood is nie. Hy het gesê vals nuus doen die rondte.

Skaars twee uur later het hy sy plasing verwyder en om verskoning gevra nadat hy uit talle oorde van ongevoeligheid beskuldig is omdat daar wel iemand doodgeskiet is.

In sy opvolgplasing wat begin met die woord “apologie” in hoofletters sê Mboweni hy het net bedoel dit was nie ’n student wat doodgeskiet is nie. Dit doen geensins afbreuk aan die tragiese verlies van ’n lewe nie, het Mboweni gesê. “Ek het myself nie duidelik uitgedruk nie en vra verskoning daarvoor. My diepste meegevoel.”

Dit is nie die eerste keer dat Mboweni se twiets die nuus haal nie. By ’n vorige geleentheid is hy deur Cyril Ramaphosa in die bek geruk oor ’n twiet van hom.

Die President moes Mboweni oor die vingers tik na ’n uitlating op Twitter waarin hy gesê het die Zambiese president, Edgar Lungu, moes nie die goewerneur van die sentrale bank afgedank het nie. Sy uitlating is algemeen beskou as ongeoorloofde inmenging in ’n ander land se huishoudelike sake.

Mboweni, wat bekend is vir sy omstrede twiets, het gedreig om steun te mobiliseer indien Lungu nie redes verskaf waarom Kenny Kalyalya in die pad gesteek is nie.

Ramaphosa moes verskoning vra en het gesê die “ongelukkige” uitlating van Mboweni weerspieël nie die regering se standpunt nie.

Die joernalis Heindrich Wyngaard skryf in ’n meningsartikel op Voertaal dat wanneer die President weer met sy kabinetslede oor hulle prestasiebyeenkomste gesprek voer, hy gerus aandag kan skenk aan hulle gedrag op sosiale media. Wyngaard sê die vraag wat Ramaphosa moet oorweeg, is of ministers se grondwetlike reg op vryheid van spraak aan hulle die ruimte behoort te gun om hulle op sosiale media uit te laat oor sake wat nie direk met die beleidskwessies (en krisisse) van hul eie portefeuljes te doen het nie.

  • 0
Top