Die nuwe variant van die COVID-19-virus kon nie op ’n slegter tyd gekom het vir die Suid-Afrikaanse toerismebedryf wat reeds op sy knieë is as gevolg van die opeenvolgende inperkings nie.
Travel and aviation groups are concerned by the new Covid restrictions. @FT #SouthAfricaisTravelReady #TourismRecovery #COVID19 https://t.co/0lFdRvx2cz
— SATSA (@satsa_sa) November 29, 2021
Die Federale Gasvryheidsvereniging van Suid-Afrika (Fedhasa) en die Suid-Afrikaanse Toerismedienstevereniging (Satsa) het Sondagaand in ’n verklaring gesê hulle het oornag meer as R1 miljard se reisbesprekings vir reis tussen Desember en Maart verloor as gevolg van die reisverbod wat wêreldwyd teen Suid-Afrika ingestel is.
Fedhasa se nasionale voorsitter, Rosemary Anderson, sê in ’n verklaring terwyl ons die feesgety binnegaan met ’n stygende infeksiesyfer en die vooruitsig van plaaslike inperkings wat die gasvryheidsektor direk raak, moet Suid-Afrikaners alles in hul vermoë doen om die verspreiding van ’n vierde golf te stuit.
“Ons kan eenvoudig nie ’n herhaling van Desember 2020 hê waar restaurante en gasvryheidsondernemings die swaarste gedra het aan Covid-regulasies wat reis- en restaurantbeskerming onaantreklik en moeilik maak nie.”
Sy sê die toerismebedryf moes die afgelope 20 maande van golf tot golf verduur en dit is eenvoudig nie volhoubaar om besighede oop te hou en lewensbestaan ongeskonde te hou nie. “Dit word aan elke Suid-Afrikaner oorgelaat om hul deel te doen en ons te help om ons deure oop te hou deur aan die protokolle te voldoen en hul #jab4tourism te kry,” sê Anderson.
“Dit is nou meer as ooit van kritieke belang dat ons ons binnelandse toerismebesigheid behou deur ons volle smorgasbord van besienswaardighede aan ons plaaslike mark te kan bied. Dit sluit in ons pragtige strande, interprovinsiale reise en vryheid om binnelands te reis, asook om ’n mens se gunsteling glas wyn of bier te kan geniet terwyl jy ’n sappige Suid-Afrikaanse steak by ons restaurante eet,” sê Anderson.
Die minister van toerisme, Lindiwe Sisulu, het reeds ’n dringende vergadering met al die belanghebbende rolspelers in die toerismebedryf gehou om Suid-Afrika se huidige toerismedilemma te bespreek.
We want to thank @LindiweSisuluSA for her commitment to our industry and have been working closely with the Minister to submit alternatives to the restrictions over December 2021 https://t.co/XkHdO2RiRz
— Fedhasa (@fedhasaRSA) November 28, 2021
Tydens die vergadering is daar planne beraam om proaktief te kyk na maniere waarop die private en openbare sektor kan saamwerk om die uitwerking op die toerismesektor te versag na die reisverbod wat nou teen Suid-Afrika ingestel is.
Sisulu sê terwyl daar gewag word op wetenskaplike sekerheid rondom hierdie nuwe variant, was die impak op handelsmerk Suid-Afrika en die toerismewaardeketting verwoestend.
Sy sê die onmiddellike prioriteit is om binnelandse toerisme oor die feesseisoen te beskerm sodat die bedryf se lewensbestaan gered word en die deure van toerisme- en gasvryheidsondernemings oopgehou word.
Sisulu sê sy erken en waardeer die positiewe impak van die gesamentlike benadering deur die toerismegemeenskap en belanghebbendes in die behoud van binnelandse toerisme. Sy sê daar sal gereeld vergader word om praktiese aksies wat deur belanghebbendes in die bedryf aangeneem is, te hanteer, uit te voer en op te volg. Sy sê daar sal proaktief gehandel word met die struikelblokke en krisisse wat die toerisme- en gasvryheidsektor in die gesig staar; met die onmiddellike prioriteit om te verseker dat binnelandse toerisme oor hierdie feesseisoen bewaar word om die lewensbestaan van die sektor te verseker.
Die reisbedryf het president Cyril Ramaphosa intussen geloof vir sy ferm benadering ten opsigte van mense wat huiwerig is om hulself teen COVID-19 te laat inent. Die President het Sondagaand aangekondig dat hy ’n taakspan saamgestel het om verpligte inentings vir spesifieke plekke en geleenthede te ondersoek.
President @CyrilRamaphosa insisted that South Africa would remain on lockdown level 1, while encouraging the unvaccinated to get jabbed ahead of an expected fourth wave. @IOL #SouthAfricaisTravelReady #Jab4Tourismhttps://t.co/vqZWT1h8Ay
— Fedhasa (@fedhasaRSA) November 29, 2021
Die bestuurshoof van die Vereniging van Suid-Afrikaanse Reisagente, Otto de Vries, sê die bedryf is dankbaar dat hulle hul bedrywighede oor die feestyd kan voortsit. Hy sê hulle glo ook ’n fokus op inenting is die regte manier om die pandemie te bestuur, eerder as inperkingsmaatreëls of reisbeperkings.
