"In Kaapstad het duisende betogers by die parlement byeengekom en na die Kaapstadse Internasionale Konferensiesentrum (Kiks) beweeg waar die Wêreld Ekonomiese Forum (WEF) besig was om te vergader. Die betogers het hulle woede uitgespreek teenoor die voortslepende geweld wat teen vroue en kinders gepleeg word. Die Suid-Afrikaanse Menseregtekommissie (SAMRK) sê die geweld teen vroue en kinders wat die land die afgelope weke weer geruk het, moet tot ’n einde kom. Die SAMRK het onder andere verwys na die ontvoering van die sesjarige Amy-Lee de Jager in Vanderbijlpark op 2 September voor haal skool, en die wrede moord op die 19-jarige  student, Uyinene Mrwetyana." 

"Suid-Afrikaners is keelvol vir die vlaag van geweld en anargie wat die afgelope twee weke oor die land spoel. Politieke partye en burgerlike organisasies het ’n dringende beroep op die regering gedoen om wet en orde te herstel."

"’n Saak waarin ’n mediese dokter van onetiese gedrag aangekla word omdat hy ’n vrou afgeraai het om ’n aborsie te ondergaan, het die aborsiedebat in die land opnuut laat opvlam." #Aborsiedebat

"Pretoria se middestad is Woensdag in chaos gedompel toe taxibestuurders oorlog teen vermeende buitelandse dwelmsmouse verklaar het. Woedende taxibestuurders het strate wat as toegangsroetes na die middestad lei, blokkeer en winkels is geplunder en aan die brand gesteek. Toegangsroetes na die stad is vroegoggend afgesper en busdienste moes opgeskort word weens die betoging."

"Bespiegelings op sosiale media dat die Bosasa-baas Gavin Watson sy eie dood versin het en dat dit nie regtig hy is wat Maandag verongeluk het nie, is die nek ingeslaan nadat foto’s van sy verminkte lyk deur die media onder oë gekry is."

"Die dood van die voormalige Bosasa se grootbaas Gavin Watson Maandag in ’n motorongeluk naby die OR Tambo-lughawe het die hele land aan die gons."

"Die veteraanjoernalis Max du Preez en die ewe gesoute politikus Helen Zille pak mekaar volgende maand kaalvuis in ’n openbare debat nadat hulle mekaar op Twitter in die hare gevlieg het."

"Die Krugersdorp-moordenaars wie se dade die land die afgelope maande met afgryse vervul het, sal waarskynlik nooit weer die buitekant van die tronk sien nie. Hulle is Maandag saam 28 keer lewenslange tronkstraf opgelê in die Hooggeregshof in Johannesburg."

"Met ’n Bybel onder die arm en Christelike waardes as riglyn, het Bosasa die land se geldkoffers vermoedelik so geplunder dat dit die Guptas na Sondagskoolkinders laat lyk. Dit is die prentjie wat vorendag kom in ’n boek wat pas deur LAPA Uitgewers gepubliseer is."

"Geweld het op 14 Augustus in Mokopane (Potgietersrus) in Limpopo uitgebreek toe die polisie met rubberkoeëls en traanrook op betogers losgebrand het."

"Die binnegevegte wat reeds maande lank in die ANC broei, word al hoe meer in en om die howe op die spits gedryf en die lang messe word behoorlik geslyp om mekaar keelaf te sny. Oudkamerade dagvaar mekaar die een na die ander voor die hof. President Ramaphosa veg self vir sy politieke oorlewing in ’n stryd waar daar uiteindelik net een wenner kan wees."

"Kapenaars is in die wolke oor die milde reën wat die afgelope seisoen oor die droogtegeteisterde provinsie neergesak het. Dit beteken egter nie die sluise van die hemel het al die provinsie se waterprobleme weggespoel nie."

"Werknemers van die SAUK is deur magsbehepde base geterroriseer en die openbare uitsaaier is lamgelê deur werknemers se vrees, frustrasie, pyn en hulpeloosheid. Dit is enkele van die bevindings wat Maandag bekendgemaak is in die ondersoek na bewerings van redaksionele inmenging by die SAUK. Dit volg nadat die SAUK in Mei 2018 ’n kommissie aangestel het om verskeie bewerings van politieke en redaksionele inmenging in sy nuuskantore te ondersoek."

"Kaapstad het weereens die bedenklike eer te beurt geval om aangewys te word as die gevaarlikste stad in Afrika en een van die gevaarlikste stede ter wêreld. Dit blyk uit die jongste verslag van die Mexikaanse burgerraad vir openbare veiligheid en strafreg. Volgens die verslag is Kaapstad die 11de gevaarlikste stad ter wêreld en die gevaarlikste stad in die land."

"Werkloosheid in Suid-Afrika het ’n nuwe rekordhoogte bereik en sowat tienmiljoen Suid-Afrikaners sit sonder werk. Dit is die hoogste werkloosheidsyfer in die land se geskiedenis. Die kommerwekkende toedrag van sake is deur Statistieke Suid-Afrika (SSA) bekend gemaak in hulle jongste kwartaallikse indiensnemingspeiling."