Marianne Lomberg (BVSc Hons) is ’n veearts wat dit geniet om met mense oor hulle diere te gesels. Stuur jou vrae na veearts@voertaal.nu.
Marianne Lomberg (BVSc Hons) is a veterinarian who enjoys talking to people about their animals. Send your questions to veearts@voertaal.nu.
Marianne Lomberg (BVSc Hons) is een dierenarts die graag met mensen over hun dieren praat. Stuur je vragen naar veearts@voertaal.nu.
***
Cornelia skryf:
Hallo Marianne
Ek het ’n chihuahuahondjie ('n mengsel) en haar lewer het skade gekry deur ’n bosluisbyt wat kwaai infeksie veroorsaak het.
Sy is nou baie beter en is op leweraanvullings (Essentiale extreme en milk thistle). Maar nou het sy van gister af kwaai begin rou wortels eet. Sy wil nie ophou eet nie. Sy soek aanhoudend nog.
Sy het nooit tevore wortels geëet nie.
Is dit dalk ’n tekort aan iets?
Sy is ook op Hills se hondekos, die “derm complete”.
Beste Cornelia
Die oorgrote meerderheid honde wat aan vreemde dinge begin knaag, het nie ’n tekort aan ’n voedingsstof nie, hulle geniet net die smaak of die tekstuur. Trouens, ek stel gereeld voor dat eienaars van klein hondjies wat vertand vir hulle vars, of gevriesde, wortels gee om aan te kou om die jeuk in hul tandvleis teë te werk. Wortels is gesond, vol vitamiene en vesel, en relatief laag in kalorieë.
Maar in jou kleinding se geval sal ek aanraai dat jy tog haar bloed laat toets om seker te maak sy het nie dalk ’n wanbalans as gevolg van die lewerskade nie. Die lewer is byna toweragtig in sy vermoë om homself te vernuwe ná beskadiging, maar dit neem tog tyd en ons wil altyd maar versigtig wees met sulke klein diertjies.
Groete
Marianne
Vandag se antwoord word geborg deur My Pet Club (www.mypetclub.co.za). My Pet Club wil jou help om tyd en geld te bespaar, ook kennis op te bou wat jou sal help om die beste moontlike sorg aan jou troeteldiere te gee.
Lees ook:
Vra die veearts: Dit lyk soos ’n bosluis, maar is dit velkanker?
Vra die veearts: My hond wil niks anders as tafelkos eet nie
Vra die veearts: Raad vir ’n rou kol wat nie wil genees nie?
Vra die veearts: Is daar ’n verskil tussen ’n dierenarts en ’n veearts?
Vra die veearts: Sodra dit aand word, toon hond my vreemde gedrag
Vra die veearts: Dit lyk of iets in ons troetelhen se keel vassit
Vra die veearts: My nege weke oue rottweiler-tefie het katgriep
Vra die veearts: Kan iemand help om ons honde in vrede saam te laat wees?
Vra die veearts: My hond raak histeries, so erg dat sy my byt
Vra die veearts: My Jack Russell is doof, grondpaaie laat hom kerm
